ئێكه‌م مۆبايلا ئەندرۆید دێ گرنگترین تایبەتمەندیێن ئایفۆن 16 یێن سەره‌نجراکێش بینت

سه‌ما

لدوڤ زانياريان هاتيه‌ ئاشكراكرن کۆمپانیا ئۆپۆ کار ل سەر پێشکێشکرنا بشکۆکەکا نوی د مۆبايلا خوە یا پێشەنگ یا داهاتی دا دکەت، ئۆپۆ فایند ئێکس 8، کو دێ تایبەت بیت ژ بۆ گرتنا وێنەیان ب شێوازێ کامێرایێن پیشەیی، کو هەمان بشکۆکە یا کو دێ د ئایفۆن 16 یا داهاتی یا ئەپڵ دا ژ بۆ جارا ئێکێ هێت، ل گۆر گۆتەگۆتان.

گەلەک راپۆرت و ئاشکراکرنان پشتراست کر کو کۆمپانیا ئەپڵ کار ل سەر زێدەکرنا بشکۆکەکا نوی د لەشێ ئایفۆن 16 یا داهاتی دا دکەت، دێ بشکۆک ب ناڤێ “گرتن” یان “Capture Button” بیت، و دێ ل ئالیێ راستێ یێ مۆبايلێ بیت و تایبەت بیت ژ بۆ گرتنا وێنەیان یان تۆمارکرنا ڤیدیۆیان، و ئەنجامدانا هندەک ئەرکێن دی یێن تایبەت ب وێنەگرتنێ ب کامێرا پشتێ.

هەرچەندە هێشتا ئایفۆن 16 نەهاتیە دەرئێخستن، ئاشکراکرن ژ تۆڕا ویبۆ یا جڤاکی یا چینی دەرکەتن، کو دبێژن مۆبايلا ئۆپۆ فایند ئێکس 8 یا داهاتی، دێ بشکۆکەکا نوی ل ئالیێ راستێ هەبیت و دێ تایبەت بیت ژ بۆ وێنەگرتنێ و ئەرکێن کامێرا پشتێ، هەر وەکی ئایفۆن 16 – ئەگەر ئاشکراکرن راست بن.

دبیت ئەڤ ئاشکراکرنە گەلەک گەنگەشەیان ل دۆر پرسا لاساییکرنێ د ناڤبەرا کۆمپانیێن مۆبايلێن زیرەک دا پەیدا بکەن، ئەگەر کەسەک گومانێ د وێ یەکێ دا بکەت کا کێ لاسایی یێ دی کریە، دڤێت ئەم بێژین کو تەلەفۆنێن کۆمپانیا سۆنی بەری هەمیان بشکۆکەکا تایبەت ژ بۆ وێنەگرتنێ پێشکێش کربوون، و ژ بەر هندێ دکارین بێژین کو ئەپڵ و ئۆپۆ بیرۆکە ژ سۆنی وەرگرتیە.

ل گۆر وان زانیاریێن هاتینە بەلاڤکرن، بشکۆکا تایبەت یا گرتنێ د ئۆپۆ فایند ئێکس 8 دا دێ ناڤێ “گرتن – Capture” وەکی ئایفۆن 16 نەهەلگریت، لێ دێ ب ناڤێ “بشکۆکا لەز – Quick Button” بیت، و دێ ل هەمان جهێ وێنەگرتنێ ل ئالیێ راستێ یێ لەشێ تەلەفۆنێ بیت، و ژ جهێ وێ دیار دبیت کو مەبەستا سەرەکی ژێ هاسانکرنا بکارئینانا کامێرایێ یە.

پشتی وەرگێڕانا وێنێن روونکرنێ یێن هاتینە ئاشکراکرن، ئەڤ بشکۆکە دێ نە تەنها بۆ کاميره‌یێ بته‌ بکارئینان، لێ دێ هەروەسا د یاریان دا ژی بێته‌ بکارئینان، هەروەسا دێ بکارهێنەر بشێن تلیێن خوە ل سەر ڤێ بشکۆکێ بکێشن ژ بۆ مەزنکرنا وێنەیان د ناڤ گەلەریێ دا، کو دیار دکەت ئەڤ بشکۆکە دێ نە بشکۆکەکا راستەقینە بیت لێ دێ بشکۆکەکا هەستیار بیت کو ب مۆتۆرێ لەرزینێ کار دکەت.

د دەمێ وێنەگرتنێ دا، بشکۆک دێ وەکی کامێرایێن پیشەیی کار کەت، ئانکو دێ نیڤ-پەستانەکێ قەبیل کەت ژ بۆ سەپاندنا فۆکەسێ، پاشی بەردەوامبوون د پەستانا تەمام دا.