بنگه‌هێ لالش:هه‌تا نهۆ خوون ژ برينێن تاوانێ درژيێت و ئێزدى ژ ئازارێن پشتى تاوانێ دنالن
_ سوپاسيا گەڵ وحكومه‌تا كوردستانێ دكه‌ين کو ملێ خۆ داينه بن بارێ مه يێ گران و ئێش و ئازارێن مه سڤک کرینە.
به‌رى10سالان تيرۆرستێن داعش هێرشى سه‌ر ده‌ڤه‌را شنگالێ كرن ب مه‌ره‌ما قركرنا ئێزديان نه‌خاسمه يێن وێ دڤه‌رێ كو دبنه پشكا هه‌ره پتر ژ ئاكنجيێن شنگال و دئه‌نجامدا ب هه‌زاران كچ و ژن و زه‌لام و زارۆك هاتنه ره‌ڤاندن و ب ده‌هان گۆڕێن ب كۆم ته‌رمێن ب سه‌دان جانگۆريان هه‌مبێزكرن،زێده‌بارى تالانكرنا ملك و مال و وێرانكرنا گوند و كۆمه‌لگه‌هان.
جهێ داخێ يه كو هه‌تا نهۆ خوين ژ برينێن وێ تاوانا دژى مرۆڤايه‌تيێ درژيێ و هه‌ر تاكه‌كى ئێزدى ل هه‌ر جهه‌كێ بت ژ ئازارێن پشتى تاوانێ دنالينێ،بێ كو چاره‌سه‌ريه‌كا بنگه‌هين ژبۆ برينێن روودانا جينۆسايدێ و ئازارێن ل شوون خۆڤه هێلاين بێته ديتن،كو ب ديتنا مه وه‌كو بنگه‌هێ لالش به‌شێ سه‌ره‌كى يێ وێ چاره‌سه‌ريێ د ڤان خالێن ل خوارێ دايه:
ئێك:پێشكێشكرنا ئاسانكاريا ژبۆ دادگه‌ها تاوانێن نێڤ ده‌وله‌تى ژبۆ ئێكلايكرنا كه‌يسێ ڤێ تاوانێ و ناساندنا وێ وه‌كو جينۆسايد،داكو دادپه‌روه‌رى بكه‌فته سه‌ر ڕێكا خۆ يا راست.دوو:ده‌ركرنا ياسايێن رێگر ل به‌ر ته‌كفيركرنێ و گۆتارا كه‌رب و كينێ و سزادانا هه‌ر كه‌س و ئاليه‌كى تاوانبار ب هه‌ردوو مژارێن ناڤهاتى ب توندترين سزايان.
سێ:به‌شداريكرنا پێكهاتێ ئێزدى ل رێڤه‌برنا هه‌موو جومگێن جێبه‌جێكار و ياسادانانێ و دادپه‌روه‌ريێ ب پێى پرانسيپێن دادپه‌روه‌ريا جڤاكى.
چار:دروستكرنا ژينگه‌هه‌كا ئارام و ساخله‌م کو تێدا هه‌لێن كار و خواست و داخوازيێن ته‌خا گه‌نجان بێنه دابينكرن.
پێنج:ئاسايیكرنا ره‌وشا شنگالێ و نه‌هێلانا ململانێن سياسى و دياردێن چه‌كداريێ و بجهئينانا خالێن رێككه‌فتنامه‌يا شنگالێ، دگه‌ل كاركرنێ ژبۆ ڤه‌گوهاستنا شنگال ژ قه‌زايه‌كێ بۆ پارێزگه‌هه‌كێ.
شه‌ش:ئاڤه‌دانكرنا شنگال و ده‌ڤه‌رێن دى يێن ئێزديان و جێبه‌جێكرنا پرۆژێن ستراتيژى ل وان ده‌ڤه‌ران.
هه‌فت:په‌يره‌وكرنا سياسه‌ته‌كا په‌روه‌رده و فێركرنێ يا پێشكه‌فتيانه ژقۆناغا باخچێ ساڤا بگره و هه‌تا ب قۆناغا زانكۆيێ،ب مه‌ره‌ما دانانا بنه‌مايه‌كا موكووم ژبۆ ئه‌فراندنا جڤاكه‌كا مه‌ده‌نى و ئاڤاكرنا مرۆڤه‌كى هزر ڤه‌كرى و به‌رهه‌م هێنەر كو رێزێ ل ره‌وشه‌نبيريا يه‌كترقه‌بوولكرن و هه‌مه‌جۆريێ بگرت.
هه‌شت:هاندانا لێڤه‌گه‌رێن ئايينێ ئيسلامێ ژبۆ حه‌رامكرنا رشتنا خوينا ئێزديان،ژبه‌ر بيروباوه‌رێن وان يێن ئايينى و گه‌هاندنا په‌يامه‌كێ ژبۆ جادده‌يا ئيسلامى،نه‌خاسمه ب رێيا منبه‌رێن مزگه‌فتان،هه‌ر ديسان كه‌نالێن راگه‌هاندنێ سه‌باره‌ت ب ده‌ره‌وده‌رخستنا وان شاشيێن به‌رى نۆكه ده‌رهه‌قێ ئێزديان وه‌كو خوه‌دان ئاينه‌كێ يه‌كتا په‌رست هاتينه نڤيسين يان گۆتن.
نه‌هـ:سالانه كۆنفرانسێن نێڤ ده‌وله‌تى ژ ئاليێ زانكۆيێن عيراقا فيدرال و هه‌رێما كوردستانێ بێنه به‌ستن سه‌باره‌ت جينۆسايدێن ده‌رهه‌قى ملله‌تێ كورد ب گشتى و ئێزديان ب تايبه‌ت هاتينه ئه‌نجامدان.
ئه‌م سوپاسيێن بێ پايا‌ن ئاراسته‌ى گه‌ڵ و حكومه‌تا هه‌رێما كوردستانێ دكه‌ين يێن كو ژ ئێكه‌م رۆژدا و هه‌تا رۆژا ئيرۆ وه‌كو ئه‌ركه‌كێ مرۆڤايه‌تى و نه‌ته‌وايه‌تى ملێ خۆ داينه بن بارێ مه يێ گران و ئێش و ئازارێن مه سڤك كرينە،هه‌روه‌سا رزگاركرنا شنگال و تێكشكاندنا ئه‌فسانه‌يا داعس ل سه‌ر ده‌ستێن پێشمه‌رگه‌يێن قه‌هره‌مان ب سه‌ركردايه‌تيا سه‌رۆك و لێڤه‌گه‌رێ هێژا كاك مه‌سعود بارزانى و رزگاركرنا زێده‌تر ژ 3 هه‌زار گرتيێن ئێزدى ژ ده‌ستێ داعش ژئاليێ نڤيسينگه‌ها سه‌رۆكێ هه‌رێمێ رێزدار نێچيرڤان بارزانى و پشته‌ڤانى يا بێ سنوورا رێزدار مه‌سرور بارزانى سه‌رۆكێ ئه‌نجومه‌نێ وه‌زيرێن حكومه‌تا هه‌رێما كوردستانێ ل جڤاكا ئێزدى،نه‌خاسمه ته‌خا رزگاربوويێن ژ ده‌ستێ داعش جهێ رێز و سوپاسيا هه‌ر تاكه‌كى ئێزدى و هه‌ر نيشتيمان په‌روه‌ره‌كى يه.
جيێ جانگۆريان به‌هشتا به‌رين بت.
ئازادى ژبۆ داك و خوشك و باب و برايێن مه يێن هه‌تا رۆژا ئيرۆ چاره‌نڤيسىێ وان يێ نه‌ديار.
بنگه‌هێ لالش يێ ڕه‌وشه‌نبيرى و كۆمه‌ڵايه‌تى/دهۆك
2ى ته‌باخا 2024ێ