سه‌ما
مه‌حمود محه‌مه‌د په‌یڤدارێ پارتی دیموكراتی كوردستان ده‌رباره‌یی ره‌وشا كه‌ركوكێ و هه‌لبژارتنا پارێزگارێ كه‌ركوكێ ڕاگه‌هاندنه‌ك به‌لاڤكر.
ده‌قێ وێ ڕاگه‌هاندنێ:
ده‌رباره‌یی گۆهورین و داوی پێشهاتێن گرێدایی پێكئینانا حكومەتا خۆجهییا كەركووكێ، مە هەر پشتی ڕاگەهاندنا دەرئەنجامێ هەڵبژارتنێن كەركووكێ ئەو تێبینییە هەبوون كو ئه‌و ئەنجامە دەرخەرێ ئیرادا ڕاستەقینە یا ئاكنجییێن كەركووكێ نینن، بەلێ ژبەر بەرژەوەندییا گشتییا خەڵكێ كەركووكێ و لبه‌رچاڤگرتنا ره‌وشا وی باژێری و سه‌رجه‌مێ پڕۆسا سیاسی مه گوهێ خۆ نه‌دایێ. ل وی ده‌می گه‌له‌ك بزاڤ هاتنه كرن بۆ هندێ ل كەركوكێ هەموو لایەك بگەهنە ئەنجامان و چارەسەرییه‌كا گونجایی، چونكی ره‌وشا كەركوكێ ره‌وشه‌كا ئیستسنائییە و چارەسەرییا وێ ژی دڤێت چارەسەرییه‌كا ئیستسنایی بیت و د خزمەتا ڤه‌ژاندن و سەقامگیری و خۆشگوزەرانییا خەڵكێ وی باژێری دا بیت.
د درێژاهییان ئەوان بزاڤان دا، ل گەڵ لایەنێن عەرەب و توركمانان چەندین كۆمبوون هاتنه ئەنجامدان” د داوی كۆمبووندا ل 4ی ته‌باخا 2024 ێ” ل گەڵ جەنابێ سەرۆك بارزانی دا كو سەرجەم نوونەرێن عەرەب و توركمانان ئامادە بوون، ته‌كه‌زی ل سه رهندێ هاته كرن” پێدڤییه چارەسەری ب ئاراستەیێ لبه‌رچاڤ وه‌رگرتنا مافێ سەرجەم پێكهاتێن كەركوكێ و د چارچوڤێ تەوافوق و كۆدەنگییا نیشتیمانیدا بیت و هەموو لایەك ل سەر هندێ د هه‌ڤڕا بوون كو نابیت ئەزموونێن پێشی دووبارە ببن و بوچوونا جەنابێ سەرۆكی ژی ئەو بوو كهو بۆ دڵنیاییا هەموو لایەكێ پارێزگاره‌كێ كورد و بێلایەن بهێته دیاری كرن كو ژ لایێ هەموو لایەنێن سه‌ركه‌فتی یێ پەسەند بیت” د درێژاهییا گوهۆرینان و د ئەنجامدا ل سەر هندێ ڕێككەڤتن هاته كرن كو پارێزگارێ كەركووك ب شێوێ ( سێیانی) بیت. ئەو بوو هەر لایەكێ داخواز دكر كو پێدڤییە بۆ گه‌را ئێكێ پارێزگار ژ پێكهاتێ ئەوان بیت و جەنابێ سەرۆكی ژی پێداگیر بوو ل سه‌ر هندێ كو دڤێت بۆ جارا ئێكێ پارێزگار كەسه‌كێ كورد بیت. هەروەسا سەرۆك بارزانی داخواز ژ وان كر ئەگەر ب وی مەرجی ڕازی نه‌بن كو بۆ جارا ئێكێ پارێزگار كورده‌كێ بێلایەن نەبیت ئەو دشێنن بچن ل گەڵ ئێكه‌تییا نیشتیمانی ڕێك بكەڤن، به‌لێ هەر هەموو ڕەتكرن ل گەڵ ئێكه‌تییێ ل سەر دانانا پارێزگاری ڕێك بكەڤن” پشتی هنگێ چەندین كۆمبوونێن دیتر هاتنه ئەنجامدان، هەر چەندە هەموو جاران نیسابێ یاسایی بۆ دیاركرنا پارێزگاری تەمام دبوو، بەلێ لبه‌رچاڤگرتنا ڕۆلێ بزاڤ و ناڤەندگیرییێن بەڕێز سودانی دهاته كرن” چونكی ئه‌و دۆسیە د دەستێ ئەوی دابوو و گه‌له‌ك بزاڤ بۆ كۆمكرنا لایەنان و گەهشتنا چارەسەرییه‌كا گونجایی بۆ كەركووكێ دابوو.
ئەوا ل ڕۆژا 10ی ته‌باخێ ل ئۆتێلا ڕەشید ل بەغدا بۆ دانانا پارێزگاری و حكومەتا خۆجهییا كەركوكێ بێی ئاگه‌هداركرنا هەموو لایەنان و د غیابا نوونەرێن توركمان و پشكه‌كا عەرەب و پارتی هاتییه كرن، نه یا یاسایی یە و كێشه هەیە و ل سەر ڕێیه‌كا دروست نینە” ئەوا هاتییه كرن نه‌شێت ببیتە چارەسەرییه‌كا دروست بۆ تێپەڕاندنا كێشەیێن كەركوكێ. چارەسەركرن و نەهێلانا كێشەیێن ئەوی باژێری و سارێژكرنا ژان و ئازارێن خەڵكێ كەركووكێ ب موزایەدات و عاتیفێ و یارییا سیاسی ناهێته كرن” چارەسەر ئەوە تاكڕۆیی نەهێته كرن و بزاڤا پشتگوهخستنا لایەنان نەهێته دان و هەموو لایەك ب نیه‌ته‌كا پاقژ و ژ پێخه‌مه‌تی خزمەتكرنا خەڵكی د بڕێڤەبرنا كەركوكێ دا پشكدار بن.