ناڤه‌ندا نووچه‌يان – سه‌ما
ب هەلکەفتا دەربازبوونا 11 سالان ل سەر ئازادکرنا شنگالێ ل سەر دەستێ هێزێن پێشمەرگەیێن کوردستانێ و ب سەرپەرشتیيا ڕاستەوخۆ یا سەرۆک مەسعود بارزانى، دەستەیا بلند یا بنگەهێ لالش یێ ڕەوشەنبیرى و جڤاکى بەیاننامەیەک بەلاڤکر، ئەڤە دەقێ وێ یە:
بەرى یازدە سالان، و ب دیارکرى ل 13ـى چریا دویێ2015، هێزێن پێشمەرگەیێن کوردستانێ ب سەرپەرشتیيا راستەوخۆ یا جەنابێ سەرۆک بارزانى، و ب پشتەڤانیيا ئاسمانى یا فرۆکەیێن هەڤپەیمانان، باژێرێ شنگالێ ژ ده‌ستێن چه‌په‌لێن تیرۆرستێن داعش ب ئۆپەراسیۆنەکا دیرۆکى ئازادکرن.
ل 3ـى ته‌باخا ي2014، شنگال تووشى ئێرشەکا هۆڤانە ژ ئالييیێ تیرۆرستێن داعشێ ڤە بوو و هاتە داگیرکرن، کو بوو ئەگەرێ ئەنجامدانا چەندین تاوان و دڕندەییان ده‌هەقێ خەلکێ سڤیل یێ وێ دەڤەرێ دا.
و پشتى سالەکێ ژ داگیرکرنێ، و ل4ـى ته‌باخا 2015، سەرۆک بارزانى سۆزا ئازادكرنا شنگالێ دا؛ و پشتى 100 ڕۆژان ژ وێ سۆزێ، و ل د دەمژمێر هەفتێ سبێ دا، ئۆپەراسیۆنا ئازادكرنێ ژ چار به‌ره‌يان ڤە ب پشکداریا 7500 پێشمەرگەیان و ب سەرکردایەتیيا سەرۆک بارزانى، و ب پشتەڤانیيا ئاسمانى یا فرۆکەیێن شەڕکەر یێن هەڤپەیمانان دەست پێ کر.
و ل 13ـى چریا دویێ 2015، سەرۆک بارزانى ژ چیایێ شنگالێ مزگينييا ئازادکرنا باژێرى ژ تیرۆرستێن داعش دا، و دووپاتکر کو ئەڤ سەرکەفتنە ب دەستکەفتەکێ مەزن بۆ گەلێ کوردستانێ ژ ئالييێن لەشکەرى، سیاسى و دیرۆکى ڤە دئێتە هژمارتن ب خێرا مەردانیيا پێشمەرگەیێن قەهرەمان. و مێرخاسیيا پێشمەرگەى دەنگڤەدانەکا بەرفرەهـ د دەزگەهێن ڕاگەهاندنا جیهانى دا هەبوو، و ئازادکرنا شنگالێ بوو دەرگەهەک بۆ ئازادکرنا دەڤەرێن دى یێن دەوروبەرێ وێ و پاشى سەنتەرێ پارێزگەها نەینەوا.
ئەم ل بنگەهێ لالش دا، ڕۆلێ دیرۆکى یێ سەرۆک بارزانى، و هێزێن پێشمەرگەیێن کوردستانێ، و هەموو قەهرەمانێن کو ب خوونا خۆ ئەڤ داستانا قەهرەمانى یا پڕ سەروەرى بۆ ئازادکرنا شنگالێ تۆمارکرى، بلند دنرخینین. هەروەسا سوپاسى و پێزانینێن خۆ ئاراستەیى هێزێن هەڤپەیمانان دکەین بۆ ڕۆلێ وان یێ ب بها د پشتەڤانیکرنا پێشمەرگەى و تێکشکاندنا تیرۆرستێن داعش دا.
ئەڤ بیرەوەریە د دەمەکى دا دئێت کو هێشتا پشکەکا مەزن ژ ئێزدييان، و پشتى دەربازبوونا 11 سالان ل سەر ئازادکرنێ، ژ ئاوارەبوونێ د ناڤ کەمپان دا دنالن، و نكارينه ڤەگەڕنە سەر مال و حالێن خۆ ژ بەر نەبوونا سەقامگیریيێ و نەبوونا خزمەتگۆزاریيان.
لەورا، ئەم داخوازێ ژ هەموو ئالييێن پەیوەندیدار دکەین کو ب لەز شنگالێ ئاڤادان بکەنەڤە و كه‌يسا دانپێدانێ ب جینۆسایدێ ئێکلا بکەن و قوربانيیێن وێ قەرەبوو بکەن.
بنگەهێ لالش یێ ڕەوشەنبیرى و جڤاکى / دهۆک
13/11/2026