سه‌ما
په‌يڤدارێ ئەنجوومەنێ ئاسایشا نەتەوەیی یێ ئەمریکا رادگەهینیت، ئەم پێشبینی دکەین د ڤێ هەفتیێ دا ئیران دێ هێرشەکا بەرفرەهـ ل سەر ئیسرائیلێ کەت.
د لێدوانه‌كا رۆژنامەڤانی دا، جۆن کێربی،په‌يڤدارێ ئەنجوومەنێ ئاسایشا نەتەوەیی یێ ئەمریکا راگەهاند، کو ئەگەر هەیە د ڤێ هەفتیێ دا ئیران هێرشەکا بەرفرەهـ ل سەر ئیسرائیلێ بکەت و هۆشداری ژی دا کو پێدڤیە ئەم بۆ ئەگەرێ زنجیرەیەک هێرشێن بەرچاڤ ئامادە بین.
وی هەروەسا گۆت: دەربارەی دەمێ هێرشێ، ئەم و هەڤالێن خوە یێن ئیسرائیلی هەمان پێشبینی هەیە و دبیت د ڤێ هەفتیێ دا هێرشا ئیرانێ ل سەر ئیسرائیلێ رویبدەت.
ژ ئالیەکێ دی ڤە، د راگەهاندنەکێ دا، کۆشکا سپی یا ئەمریکا راگەهاند کو جۆ بایدن، سەرۆکێ ئەمریکا پەیوەندی ب سەرۆکێن هەر ئێک ژ فەرەنسا، ئەلمانیا، ئیتالیا و بەریتانیا رە کریە و رەوشا رۆژهەلاتا ناڤین شرۆڤە کرینە.
گۆت ژى: هەر پێنج وەلات د راگەهاندنەکێ دا کو ئاراستەی ئیرانێ کرینە، داخواز ژ ئیران و هەڤپەیمانێن وێ دکەن کو ژ هەر جۆرە هێرشەکێ کو دبیتە ئەگەرێ زێدەکرنا گرژیێن دەڤەرێ و تێکدانا دەرفەتا ئاگربەستا غەززە دویر بکەڤن.
د هەمان دەم دا وان هۆشداری دا ئیرانێ کو ئیران دێ بەرپرسیاریا هەر کریارەکێ کو ببیتە ئەگەرێ تێکدانا ئاشتی و ئارامیێ ل دەڤەرێ هەلگریت.