سه‌ما
هۆنەرمەند حەسەن شەریف سترانەکا نوو ب ناڤێ “کوردمەدار” بەلاڤكر و و دەربارەی ڤێ بەرهەمێ دبێژت، زێدەتری چل سالانە و ژ وی دەمێ کو د کارێ هۆنەری دا مژوولم و سترانان بۆ نەتەوە و نیشتیمانى دبێژم، وەکی نهۆ ئەز خوشحال نەبوومە.
هۆنەرمەندێ ناڤدارێ کورد حەسەن شەریف راگەهاند، سترانا “کوردمەدار” ژ هەلبەست و ئاوازێن هەڤالێ هۆنەرمەند “ئەمین بۆتانی” یە، ئەز دكارم بێژم؛ ئەڤە زێدەتری چل سالانە و ژ وی دەمی کو ئەز د کارێ هۆنەری دا مژوولم و سترانان بۆ نەتەوە و نیشتیمانى دبێژم؛ وەکی نهۆ ئەز خوشحال نەبوويمە، چنکو تێکستا سترانێ چ وەکی کورد و چ وەکی سترانبێژ دل و دەروونێ من گەش کریە.
حەسەن شەریف دەربارەی سترانا خۆ یا نوو ئاماژە كر، ئەو د وێ باوەریێ دایە هەر کوردەکێ پاک و گرێدایی دۆز و ئاخا کوردستانێ، هەر حەزکەرەکێ جیهانا ئاواز و سترانان کو گۆهداریا سترانێ بکەت بێگۆمان دێ پێ خۆشحال بت، ژبەرکو ب هەموو پیڤەران د ئاستەکێ بلند دایە و ئاخفتنا دلێ هەر کوردەکێ دلسۆزە کو سەربلندیا وەلاتی ئارمانجا وی یا سەرەکی بت.
هه‌روه‌سا ديار ژى كر، ب هیڤیا کو کوردمەدار ئەو سترانە بت کو خزمەتا زێدەتر ب ئاخ و نەتەوە و کوردایەتیا ڕاستەقینە بکەت و هەستێ کوردستانیبوونێ بۆ دۆز و داخوازا ڕەوا یا نیشتیمانی گەش بکەت،کو بەرهەمێ رەنج و قوربانیدانا کوردستانیان و پێشمەرگەیێن قارەمان و خوونا سۆر یا شەهیدێن کورد و کوردستانێ یە.
حەسەن شەریف هۆنەرمەندەکێ ناڤدار یێ کوردە و ل سالا 1969 ل بەرواریا بالا ل پارێزگەها دهۆکێ ژ دایک بوویە، خودانێ چەندین سترانانە ب هەردوو زاراڤێن ژۆری و خواری کو بەشەک ژ سترانێن وی بۆ نەتەوە و نیشتیمانى گۆتینە.