سه‌ما
سترانبێژه‌كێ فلكلۆرى يێ به‌رناسێ چيايێ شنگالێ دبێژت،ئێزدی خودان فلكلۆره‌كێ زه‌نگینن و پاراستنا وى ئه‌ركێ مه هه‌موویانه ب ته‌خا هۆنه‌رمه‌ندان.
خه‌لۆ شنگالى، سترانبێژێ فلكلۆرى يێ ده‌ڤه‌را شنگالێ بۆ سه‌ما گۆت: سترانا فلكۆری مێژوویه‌كا كه‌ڤناره و ڤه‌دگه‌رته بۆ سه‌دان سالان و ژ هه‌بوون و روودانه‌كێ دروست بوویه،ئه‌ڤجا چ ئه‌شق و ئه‌ڤینی بت یان شه‌ره‌ك …هتد، هه‌روه‌سا به‌لگه‌یێن فرمان و جه‌نگ و ئه‌شق و ئه‌ڤینیه‌كێ یه، له‌ورا یا ڕه‌وا نینه ده‌ستكاری د په‌یڤان و هه‌تا ئاوازێ ژی دا بێته‌كرن، چنكو دێ بته ئه‌گه‌رێ به‌رزه‌كرنا ناڤه‌رۆكا وێ روودانێ.
شنگالى زێده‌تر گۆت: ئه‌گه‌ر ئه‌م به‌رپه‌رێن مێژوویا فلكلۆری ڤه‌كه‌ین دێ بینین سترانێژێن مه ب ڕۆژ و مه‌هان ب سترانه‌كێ ڤه‌بووینه، داكو تام و سه‌نگا وێ یا پاراستی با ئه‌وژی ژ پێخه‌مه‌ت وێ چه‌ندێ داكو زێندی بمینت و ناڤه‌رۆكا ڕاست یا روودانێ یه پاراستی بت.
ديار ژى كر، ئه‌م ئێزدی خودان فلكلۆره‌كێ زه‌نگینین و پاراستنا وێ ئه‌ركێ مه هه‌موویانه ب تایبه‌ت ته‌خا هۆنه‌رمه‌ندان ، چنكو پاراستن و گۆتنا سترانێ ل سه‌ر ملێن مه دكه‌ڤت، پێتڤییه چاوان سترانا فلكلۆری به‌ری سه‌دان سالان دهاته گۆتن دڤێت وه‌كو وێ په‌یڤ و ئاواز بێته گۆتن و ئه‌ڤه به‌رپرسیاره‌تییا مه‌یه و بپارێزین.
ناڤهاتى خواست سترانبێژێن نۆكه خۆ ژ ده‌ستكاریكرنێ دسترانا فلكلۆرى دا دوور بكه‌ن، چنكو هه‌ر ده‌ما ده‌ستكاریكرن هاته كرن تام و سه‌نگا خۆ دێ ژ ده‌ست ده‌ت، د هه‌مان ده‌م دا دێ بته ئه‌گه‌رێ وێ چه‌ندێ ئه‌م ناسناما خۆ یا فلكلۆری ژ ده‌ست بده‌ین.