سەرۆك مەسعود بارزانی، پەیامەک ب هەلكەفتا 78 سالیا دامەزراندنا پارتی دیموكراتی كوردستان بەلاڤکر، ئەڤە دەقێ وێ یە:
ب ناڤێ خودایێ مەزن و دلۆڤان
ب هەلكەفتا حەفتێ و هەشت سالیا دامەزراندنا پارتی دیموكراتی كوردستان، پیرۆزباهیان ل هەموو كادر و ئەندام و لایەنگرێن پارتی دكەم، پیرۆزباهیێ ل خێزانێن سەربلندێن شەهیدان و پێشمەرگێن قارەمان و هەموو تەخ و چین و پێكهاتێن كوردستانێ دكەم، هیڤییا سەربلندی و خوەشیێ بۆ دخوازم.
دامەزراندنا پارتی ل شازدەی تەباخا 1946 ێ ب رێبەریا بارزانیێ نەمر زەروورەتەكا دیرۆكی بوو بۆ درێژەپێدان ب خەبات و تێكۆشینا گەلێ كورد د وی دەمێ دژوار دا، هەموو بزاڤێن نەیار و داگیركەرێن كوردستانێ ئەو بوو شۆڕش و ئازادیخوازیا گەلێ كوردستانێ بێدەنگ بكەت، پارتی هەر ل دەستپێكا دامەزراندنێ و هەتا نوكە ئامرازەك بوویە ددەستێ خەلكێ كوردستانێ دا بۆ بدەستڤەهاتنا ئارمانجێن دیموكراتی و نیشتیمانی و نەتەوەیی یێن گەلێ كوردستانێ.
ل 78 ە مین سالڤەگەرا دامەزراندنا پارتی رژدیێ ل وێ یەكێ دكەین كو پارتی بۆ رزگارییا گەلێ كوردستانێ و خزمەتا گەلێ كوردستانێ دروست بوویە، بۆ وێ یەكێ هاتیە دامەزراندن خەلكێ كوردستانێ سەرفەراز بیت و دۆزا رەوایا گەلێ كوردستانێ هەردەم یا پاراستی و بهێز بیت، لەورا پێدڤیە هەموو پارتییەك ل ئاست مەزناهیا دیرۆكێ و قوربانیدانا حزبا خوە و خوینا شەهیدان بن و ئەركێ خوە ب باشترین شێوە ئەنجام بدەن كو خزمەتكرن و بهێزكرنا كوردستانێ یە، هەموو لایەك ب دۆست و نەیارێن گەلێ كوردستانێ وێ راستیێ دزانن كو هەر چەند پارتی یا بهێز بیت هند دێ كوردستان ژی یا بهێز بیت.
مسعود بارزانی
16ی تەباخا 2024
