خورشید باكؤزی
هڕەبایێ
ڤێ پێلگەها ڤوڵکانا وێ
ژدوورڤە دشهیت ..
ڤەپەشینا چریسکێن وێ
شها ئاخێ و
ژینڤەژەن و باوشکێن بای
داڤێن رۆژێ دهەلمیسن و
مەژی لووچ دکەن ..
وەرگوهێزکا چەرخا چاخ و
تەڤ گەهێن دەمی گوڕۆچ دکەن ..
بێهن هەلەمورا کەونینە .
پاشماییکێن کەڤنەهزرو
رەش غەزەبا سۆڵتانانن ..
جارەکادن
شاخێن فەرمانان سەقادکەن .
ئاشوتان دکەنە بەندەک و
بۆرکانان بەروپشت
لسەرپۆڤدانکێن بای سواردکەن ..
چیا دسمن دەشتا دڕەنن
شەپۆلێن گەرمێن توفانێ و
رەمۆڵتەیا بیابانێ
ئاوازێن نیکاحێ دژەنن ..
ددۆژەهینە ..
ڤان گاوراو دۆژەهڤانان
(شنگال) و خەملا منارێ
دباڕوڤەیا رەش باوەریا خۆڤەدان و
دژانێن برینەکا نوودا
دناخێن گەرمێن
کورها فەرمانەکا دی دا
سیمایێن گەش بهوژاندن ..
مەزدگەها چاڤێن رۆژێ و
پەرستگەها پاراستنا نورها خودێ و
چڕا چاڤێن زەرادەشتی و
قەول و قەوال و سەبەقەو
شەڤ بەرات ژی
دشهاچاڤێن خویناوی دا ..
دباوشکێن گەرمێن دەمیدا شەوتاندن
ژپرتێن پێتا ستێرکا سبێ و
ژتەمبورا (برویێ شەرقی) ..
جان گوران و
هیڤی دخوینا گەرمدا شێلان ..
خەون دخەمێن پاییزیدا خەندقاندن .
زەری وپەری دگێلەشوکا
کەرباخویا ئەزەلیدا دکەربێ پێچان
دشەڤستانەکا ئاریایدا
بەرەف دۆژەهەکا هارو
بەرەف وارەک نەدیارو هاڤی برن ..
مینا شەنگێن شەڤ رەبەناو
قیزێن بەنی قورەیزییان کرنەجاری و
جاردفڕوتن
جارژی هزرێن کەڤن و گەنی
هزرێن هوڤێتیێ بۆ دگوتن ..
لەورا گەل و لژێر پەرچەما
گێژەڤانکا ڤێ باوەریێ
ل (گرعزێر) و ل( سیبا) شەهید
ل رەشکۆژیا گوندێ (کۆچۆ)
ل توخیبێ مان و نەمانێ
سوزا گەرما کرڤاتیێ
دکولەبەندو دبەدبەختییا زەمانیدا
ئێدی نەماو هاتە سۆتن …
هاتە سۆتن …
———————-