سه‌ما
وەزارەتا دارایی یا عیراقێ بڕیار دا کو د 2 رۆژێن داهاتی دا کێشەیا دەرەنگکەفتنا مووچا چارەسەر بکەت و مووچێ هەیڤا هەفتێ یێ فەرمانبەرێن هەرێما کوردستانێ بشینیت.
ئيرۆ سێشەمبوويێ 13ى ته‌باخا 2024ێ، ل پەرلەمانێ عیراقێ کۆمبوونەک د ناڤبەرا کومیتەیا دارایی، پارێزگەرێ بانکا ناڤەندی، وەزیرێن دارایی، نەفتێ و پلاندانانێ دەربارەی مووچە و چەند پرسێن دارایی ل بەغدا ب رێڤە چوو.
دکتور خەلیل دۆسکی، ئەندامێ کومیتەیا دارایی ل ئەنجوومەنا نوێنەرێن عیراقێ کو د کۆمبوونێ دا بەشدار بووی، راگەهاند کو وەزیرێ دارایی یێ عیراقێ بڕیار دایە کو رۆژا پێنجشەمبوويێ دەست ب شاندنا مووچێ هەیڤا هەفت یێ فەرمانبەرێن هەرێما کوردستانێ بێتە کرن.
دەربارەی مووچێ هێزێن ئەمنی ژی، دکتور خەلیل دۆسکی گۆت: وەزیرێ دارایی یێ عیراقێ راگەهاند کو هەتا نۆکە هوردبینی تەمام نەبوویە، پێدڤی ب رەزامەندیا محەممەد شیاع سوودانی، سەرۆکوەزیرێ عیراقێ هەیە بۆ هنارتنێ.