سه‌ما
دەستەیا نوونەرێن مامۆستایێن وانه‌بێژ سوپاسیا سەرۆک وەزیران مەسرور بارزانى دکەن و ب “خەمخۆرێ پرۆسەیا پەروەردە و فێرکرنێ” ل هەرێما کوردستانێ، ناڤێ وى دبەن.
ل رۆژا دووشەمبوويێ، 26/8/2024، دەستەیا نوونەرێن مامۆستایێن وانه‌بێژ ل هەرێما کوردستانێ، د پەیامەکێ دا سوپاسى و پێزانینێن خۆ ئاراستەیى سەرۆک وەزیران مەسرور بارزانى کر پشتى کو بریارا دامەزراندنێ بۆ نێزیکى 38 هه‌زار مامۆستایێن وانه‌بێژ د ماوەیێ هەیڤەکێ دا دەرکر.
دەستەیا نوونەرێن مامۆستایێن وانه‌بێژ ڤێ بریارا سەرۆک وەزیران مەسرور بارزانى ب “گاڤەکا گرنگ و مەزن د پرۆسەیا پەروەردە و فێرکرنێ دا” دزانن و دبێژن، “گرێبەستکرنا نێزیکى 38 هه‌زار مامۆستایێن وانه‌بێژ بریارەکا ئازا و وێرەک بوو کو بوویە جهێ رازیبوون و دلخۆشیا هه‌زاران مالبات و گەنجێن ڤى وەلاتى”.
دەستەیا نوونەرێن مامۆستایێن وانه‌بێژ ، سەرۆک وەزیران مەسرور بارزانى ب “خەمخۆرێ پرۆسەیا پەروەردە و فێرکرنێ” ناڤ کریە و دبێژن، “ئەڤ بریارە سەلمێنەرێ وێ یەکێ یە کو سەرۆکێ حکومەتێ سەرەراى دلسۆزیا خوە بۆ پەروەردە و فێرکرنێ، هەروەسا خەمخۆر و دلسۆزە بۆ مافێ مامۆستایان”.
ل رۆژا ئێك شه‌مبوويێ 25/8/2024، مەسرور بارزانى، سەرۆکێ حکومەتا هەرێما کوردستانێ، پێشوازى ل ژمارەیەک ژ نوونەرێن مامۆستایێن وانه‌بێژێن هەرێما کوردستانێ کر و پشتى گۆهدارى ل داخواز و داخوازیێن وان کرى، بریار دا ل سەر داهاتێ ناڤخۆيى یێ حکومەتێ، هەموو وانه‌بێژ کو ژمارا وان نێزیکى 38 هه‌زار کەس دبت، ببنە گرێبەست.
سەرۆک وەزیران مەسرور بارزانى سوپاسیا مامۆستا و وانه‌بێژان کر کو “سەرەراى دۆخێ زەحمەت یێ دارایى، دەست ژ کارێ خۆ بەرنەدان و درێژى ب ئەرک و پەیاما پیرۆز یا خۆ دان و بەرپرسیاریا خۆ ب جهـ ئینان.”
هەروەسا سەرۆک وەزیران مەسرور بارزانى ئاماژە ب وێ یەکێ دا کو “ب مخابنى ب شێوەیەکێ دادپەروەرانە مامەلە دگەل هەرێما کوردستانێ نائێتە کرن، هەر بۆ نموونە د ئاستێ حکومەتا فیدرال دا، ل پارێزگەهێن دى یێن عیراقێ دا، تەنێ د ماوەیێ سالەکێ دا، نێزیکى ئێک ملیۆن کەس هاتینە دامەزراندن، لێ تەنانەت ئێک کەس ژى بۆ هەرێما کوردستانێ نەهاتیە دامەزراندن”.