سه‌ما
بەرپرسەکێ مەزن ل نەتەوه‌يێن ئێکگرتى د وارێ بەرەنگاربوونا تیرۆرێ دا، هۆشدارى دا ئەنجومەنا ئاسایشا نێڤدەولەتى کو رێکخراوا داعش و کۆمپانیێن سەر ب وێ ڤە چالاکى و داراییێن خۆ ل گەلەک بەشێن ئەفریقا و سوریا و عیراق و ئەفغانستانێ بەرفرەه کرینە، کو بوویە ئەگەرێ زێدەبوونەکا بەرچاڤ د هێرش و کوشتنا هاوەلاتیان دا.
سەرۆکێ نڤیسینگەها نەتەوه‌يێنئێکگرتى یا بەرەنگاربوونا تیرۆرێ، ڤلادیمیر ڤۆرۆنکۆڤ، رۆناهى خستە سەر مەترسیا کو داعش ل عیراق و سوریا و ئەفغانستانێ پێک دئینیت، کو بوویە ئەگەرێ بلندبوونا ئاستێ هەرەشێ ل ئەوروپا.
ڤۆرۆنکۆڤ دوپاتکر کو “تیرۆر هێشتا ئاستەنگەکا مەزن ە بۆ جڤاکا نێڤدەولەتى، و ئەڤ ئاستەنگە نە یا وێ یە کو چ دەولەت ب تنێ بشێت چارەسەر بکەت”.
وى جەخت کر کو “بۆ ژناڤبرنا هەرەشا تیرۆرێ، پێدڤى ب بەرسڤێن گشتگیر و پرئالى یێن کو ب هێز پشتبەستنێ ب ستراتیژیێن سیاسى دکەن، و دگەل یاسایا نێڤدەولەتى دگونجن و ب رێبازا هەمى جڤاک و هەمى حکومەتان روهن بووینە”.
مەترسیا دووێ پەیوەندى ب ڤەگەریانا ناڤەرۆکا داعش ڤە هەیە، کو بەرپرسیاریا هێرشێن داعش یێن جیهانى گرتە ستۆیێ خۆ، ب ئارمانجا بکارئینانا وان بۆ پروپاگەندێ.
ڤۆرۆنکۆڤ د ڤى وارى دا گۆت: ل دەستپێکا کانوونا دووێ، داعش هەلمەتەکا هەڤئاهەنگ ل سەرانسەرى “وەلایەتێن” کو خۆ ب خۆ دامەزراندینە دەستپێکر، ژ وان زێدەکرنا ئۆپەراسیۆنان ل عیراق و سوریا.
وى گازى کر کو هەولێن بەردەوام بۆ بەرەنگاربوونا تیرۆرێ بێنە دان دا رێ ل گروپێ بێتە گرتن کو مفاى ژ ڤان دەستکەفتان وەرنەگریت.
بۆ گەهشتنا ڤێ ئارمانجێ، وى رۆناهى خستە سەر پێدڤیا چارەسەرکرنا “رەوشێن نەباش” ل کەمپ و ناڤەندێن گرتنێ یێن باکور-رۆژهەلاتا سوریا، و گازى دەولەتێن ئەندام کر کو هەولێن خۆ زێدە بکەن بۆ ڤەگەراندنا هاوەلاتیێن خۆ ژ ڤان کەمپان.