سه‌ما
هێرشا لەپڕ یا ئۆکرانیایێ ل سەر دەڤەرا کورسکا ڕووسی کارڤه‌دانێن تووڕە ل مۆسکۆ پەیدا کرن، هەروەکی ژ دەربڕینێن سەرۆکێ ڕووسی یێ بەرێ و جێگرێ سەرۆکێ ئەنجوومەنا ئاسایشا ڕووسی، دمیتری مێدڤێدێڤ دیار دبیت.
مێدڤێدێڤ تەئکید کر کو تانکێن ڕووسی دشێن بگەهنە مەیدانا ئاڤاهیێ ڕایخستاگ ل بەرلینێ (پایتەختا ئەلمانیا)، د بەرسڤا دەرکەفتنا زرێپۆشێن ئەلمانی د ناڤ یەکەیێن ئۆکرانی دا ل کورسک.
مێدڤێدێڤ گۆتارەکا د ڕۆژناما “بیلد” یا ئەلمانی دا کو تێدا باس ژ ڤەگەڕیانا تانکێن ئەلمانی بۆ ئاخا ڕووسی پشتی 80 سالان کربوو، ب “تۆلهلدانی” وەسف کر.
“دمیتری ئاناتۆلیڤیچ مێدڤێدێڤ” پۆستێ جێگرێ سەرۆکێ ئەنجوومەنا ئاسایشا ڕووسی ژ سالا 2020 ڤە وەردگریت، و بەری هنگی سەرۆک وەزیرێ ڕووسیا یێ دەهێ بوو ژ سالا 2012 هەتا 2020، هەروەسا بەرێ پۆستێ سەرۆکێ ڕووسیا یێ سێیێ، ژ 2008 هەتا 2012 وەرگرتبوو.
مۆسکۆ گۆت کو ئۆکرانیا هێرشەک ب ئامیرێن زرێپۆش ل سەر دەڤەرا کورسک ل باشوورێ ڕووسیا ئەنجام دایە لێ لەشکەری بەرهنگاری هێرشێ بوو، و والیێ دەڤەرێ ڕەوشا ل سەر سنۆران ب “د بن کۆنترۆلێ دا” وەسف کر.
ئالێکسی سمیرنۆڤ والیێ دەمکی یێ دەڤەرا کورسک، سێ شەمبیا بووری، گۆت کو 5 کەس هاتنە کوشتن ژ وان 2 ژ کارمەندێن ئەمبولانسێ بوون، و کێمتر نە ژ 20 کەسان د شەڕی دا برینداربوون. بەرپرسەکێ بلند یێ مافێن مرۆڤی گۆت کو 6 زاڕۆک د ناڤ بریندارا دا نە.
د دەمەکێ بەرێ یێ ئەڤ سالێ دا، هێزێن کو خۆ ب هێزێن نیمچە لەشکەری یێن خۆبەخش وەسف دکەن و د پال ئۆکرانیا دا شەڕ دکەن، هێرشەکا مەزن ل هندەک پارێن دەڤەرێن بێلگۆرۆد و کورسک ئەنجام دان. ئارمانجا ڤان هێرشان، کو زیانێن کێم چێدکەن، هێشتا نە دیارە.