سه‌ما
بنگه‌هێ لالش يێ ڕه‌وشه‌نبيرى و كۆمه‌ڵايه‌تى ل دهۆكێ و مالا ئێزديان ل باژێرێ ئۆلدنبۆرك، دوپاتيێ ل ئه‌نجامدانا چالاكيێن هه‌ڤپشك دكه‌ن بۆ پتر خزمه‌تكرنا ئێزدى و ئێزديناسيێ.
ل ڕۆژا سێ شه‌مبوويێ 20ى ته‌باخا 2024ێ، ب مه‌ره‌ما خورتكرنا په‌يوه‌نديان و هايداربوون ل سه‌ر ڕه‌وشا ئێزديان” د. سه‌عيد خودێدا ” جێگرێ سه‌رۆكێ بنگه‌هێ لالش ل دهۆكێ سه‌ره‌دانا مالا ئێزديان ل باژێرێ ئۆلدنبۆرك ل وه‌لاتێ ئه‌لمانيا كر و ژلايێ “ئلياس يانج” سه‌رۆك و ئه‌ندامێن مالێ ڤه هاته پێشوازيكرن.
دهه‌ڤديتنێ دا د. سه‌عيد خودێدا، راپۆرته‌كا ب تێر و ته‌سه‌ڵى ده‌رباره‌ى بزاڤ و كارو چالاكيێن بنگه‌هێ لالش پێشكێشكر، ب تايبه‌ت يێن ڤێ داويێ ئه‌و ژى ڤه‌كرنا كه‌ناڵى سه‌ما ب پشته‌ڤانى يا حكومه‌تا هه‌رێما كوردستانێ و پرۆژێ مينحه‌يا دارايى ب پشته‌ڤانى يا ڕاسته‌وخۆيا سه‌رۆكێ حكومه‌تێ رێزدار مه‌سرور بارزانى بۆ ڕزگاربوويێن ئێزدى ژ ده‌ستێ داعش.
جێگرێ سه‌رۆكێ بنگه‌هێ لالش تيشك ئێخسته سه‌ر به‌رده‌و‌اميا وۆركشۆب و ڕوونشتنێن ڕه‌وشه‌نبيرى و چالاكيێن هه‌مه‌جۆر يێن بنگه‌هێ لالش ل ده‌ڤه‌رێن جواديێن ئێزديان، زێده‌بارى به‌رده‌واميدان ب چاپكرنا په‌رتۆكان ل سه‌ر ديرۆك و كه‌لتۆرێ ئێزديان.
هه‌ردوو لايان دوپاتى ل ئه‌نجامدانا وۆركشۆپ و كۆنفرانسان ل ده‌مێن بێت دا كرن، ب تايبه‌ت ل بوارێ راگه‌هاندنێ پشتى كه‌ناڵى سه‌ما ده‌ست ب وه‌شانا خۆ دكه‌ت هه‌ڤكاريه‌كا مكوم دناڤبه‌را مالێ وبنگه‌هێ لالش دا هه‌بت.
ژئاليێ خۆ ڤه، سه‌رۆكێ مالا ئێزديان ب ِشێوه‌كى گشتى با‌س ل كارو بزاڤێن ڕه‌وشه‌نبيرى و كه‌لتۆرى يێن ئه‌نجامداين د ده‌رهه‌قا ئێزديێن ئه‌ورۆپا و ب تايبه‌ت يێن ئۆلدنبۆرك، ديسان پرۆژێن كو ل به‌ره دناڤبه‌را زانكۆيا ئۆلدنبۆرك و مالێ دا بێنه كرن و به‌ستنا كۆنگره و كۆنفرانسان كر.
بنگه‌هێ لالش و مالا ئێزديان به‌رده‌وام داكۆكيێ ل سه‌ر درێژه‌پێدان و هه‌ڤبه‌نديا به‌رهه‌مدار و گه‌هشتنا ئارمانجێن هه‌ڤبه‌ش دكه‌ن، بۆ پتر خزمه‌تكرنا جڤاكا ئێزديان.
