سه‌ما
پرۆگرامێ چیڤینینگ دەرگەهێن خۆ ڤەکرن بۆ وان کەسان یێن دخوازن خواندنا خۆ یا بلند وەکو ماستەر و دکتۆریایێ ل بەریتانیا بخوینن، ب شێوەیەکێ بێ بەرامبەر.
پرۆگرامێ چیڤینینگ ژ بۆ دەهان سالانە کورسیکێن خواندنێ بێ بەرامبەر ددەتە دەرچوویێن زانکۆیێن کوردستانێ و عیراقێ.
کونسولێ گشتی یێ کونسولخانا بەریتانی ل هەرێما کوردستانێ، ل هەولێرێ، ئەندرو بیزلی، ب رێیا هەژمارێن تورێن جڤاکی یێن کونسولخانا بەریتانی راگەهاند کو پروگرامێ چیڤینینگ دەست ب وەرگرتنا داخوازیان کریە ژ وان کەسان یێن دخوازن ل بەریتانیا بخوینن، ژ 6ێ تەباخا 2024ێ.
هەروەسا ناڤبری دا دیارکرن کو دامەزراوێن ئەکادیمی یێن بلند یێن بەریتانیا داخوازیان ژ پێشکێشکەرێن هەرێما کوردستانێ ژی وەردگرن، و ئەڤە بێ بەرامبەرە.
گەلەک زانکویێن ناڤدار یێن بەریتانیا، ب رێیا پروگرامێ چیڤینینگ، کورسیکان ددەنە دەرچوویێن عیراقی، ژ وان ژی پێشکێشکەرێن هەرێما کوردستانێ.
کونسولخانا گشتی یا بەریتانیا ل هەولێرێ ئەڤ نوچە ل سەر هەژمارێن خۆ یێن تورێن جڤاکی بەلاڤکر.
بەرێز بیزلی هان ددەتە پێشکێشکەران کو دەست ب تژیکرنا فورمێن خۆ بکەن و پێشکێش بکەن.
ژوان زانکویێن ناڤدار یێن بەریتانیا یێن ب ناڤ و دەنگ ل سەر ئاستێ جیهانێ:
دامەزراوا زانکویا کولێژا لەندەن
زانکویا کوین مێری یا لەندەن
زانکویا بیرمینگهام
زانکویا مانچستەر
زانکویا لیدز
زانکویا ئەبەردین، و گەلەک زانکویێن دی ل سەرانسەری بەریتانیا.
لینکێ پێشکێشکرنێ:
https://www.chevening.org/scholarship/iraq/