وەكو یە دیار و پێش چاڤ كو ل سەردەمێ نووی دا و ب تایبەتی هێرشا 3ى تەباخا 2014ێ بتر ژ هەر دەڤەرەكا دى یا عێراقێ دەڤەرا شنگالێ ژلايێ تيرۆرستێن داعش ڤه كەفتە بەر هێرشه‌كا دژوار و د ئه‌نجام دا چه‌ندين كۆمكوژى ل دژى سڤيلێن ئێزدى ئه‌نجام دان، ژبه‌ركو دەڤەرێن لايێ باشوورێ چيايێ شنگالێ بتر دناڤ كوراتيا دەڤەرێن عەرەبان دایە و هه‌روه‌سان ژبەركو ئێزدی ژ ئالیێ ئاینی ڤه د جیاوازن و هه‌روه‌سان چنكو كورد بوون لەوران ب پالپشتیا هۆز و عەرەبێن شۆفێنی زولمەكا ئێكجار مەزن ل ئێزدیان هاتە كرن.
دڤێ هێرشێ دا هەولا قركرنا خەلكێ گه‌له‌ك هاته دان و ب تايبه‌تى ژى خه‌لكێن گوندێن حه‌ردان و كۆچۆ، هه‌روه‌كو چاوان د به‌رێ دا حكومەتێن شۆفێنیێن عێراقێ قركرن و ئەنفالێن سالێن هەشتیان ئەنجام ددان هه‌ر هەمان شۆفێنییان كۆمكووژی و زولم و زۆرداری ل هەمبەر ئێزدییان ئەنجام دان، ئیرۆ رەوش گه‌له‌ك یا ئالۆزه و پشتی ده‌هـ سال ژ كۆمكووژیێ ده‌رباس بووین هەتا نۆكه ژی جینۆساید یا بەردەوامە، پشتی دەربەدەریێ و مالوێرانیێ هێشتا چارەنڤیسێ سەدان كەسان نەیێ دیارە و هندەك ژ وان د بێ سەمیانن، سەرەرایی ڤێ مالوێرانیێ جڤاكێ مە ب سەر چه‌ند لایه‌ن و ئاراسته‌يێن جودا دابەش بوویە و هەر لایەنەك ل پەی بەرژەوەندیێن خۆ كار دكت و چارەسەریێ وەك باگرەوەندێ خۆ ئانكو نەوەك ئێزدیەك دیار دكت، فەرە ئەم ل چارەسەریا راست و دروست بگەرین ژ پێخەمەت پاراستنا نفشێ پاشەرۆژێ ژ مەترسیا جینۆسایدێ و ژبۆ سارێژكرنا برینێن دایك و خوشكێن خۆ پێتڤییە ل پەی چارەسەریا لۆژیكی و راست و دروست بگەرین.
دهاوكێشەیا چارەسەریێ دا ئه‌جيندايێن ناڤخۆيى و ده‌رڤه ژى ل سه‌ر هه‌مان به‌رژه‌وه‌نديێ كار دكن و چنكو ب بیانوویێن جودا جودا هەتا نها حكومەتا فیدرال دڤێت قەبارێ ڤێ دۆزا مەزن بچوك بكت و هه‌تا ئيرۆ هێشتا وه‌ك جينوسايد په‌رله‌مانێ عيراقێ دانپێدان پێ نه‌كرییه ئه‌وژی داكو نەئێتە نێڤدەولەتیكرن و ب كێمترین زیان عيراق ژێ دەرباز بت، هەردیسان د بابەتێ هلدانا گۆڕێن بكۆم دا كار زۆر ب سستی ب رێڤە دچت ب تایبەت ژی كار ل سەر لێگەریانا ئێزدیێن گرتى ئەڤەژی ب هەڤپشكی دگەل دەولەتێن دەردۆرێن عێراقێ ب تایبەتی سووریا و توركی، چونكو هه‌ولێن لێ گه‌ريانێ گه‌له‌ك ب سستى برێڤه دچن دنها دا پرۆژه‌كى عيراقێ يێ رزگاركرنێ هاتيه راگه‌هاندن لێ هێشتا ئه‌نجام نه‌ديارن .
دروست نەكرنا دادگەهەكا تایبەت ژبۆ دادگەهكرنا تیرۆرست و كەسێن دەست دڤێ كۆمكوژیێ دا هەی، دئێته خواستن كو كار ل سه‌ر دادگه‌هه‌كا تايبه‌تمه‌ند بێته كرن و ئه‌و تۆمه‌تبارێن د ڤێ كه‌يسێ دا بێنه دادگه‌هكرن و دادپه‌روه‌رى و قه‌ره‌بوويا ڤى خه‌لكێ زيان پێكه‌فتى و كه‌سوكارێن قوربانيان بێته‌كرن، دگه‌ل وێ چه‌ندێ ژى دادپه‌روه‌ريیا جڤاكى بێته پێش و ب تايبه‌تى ژێرخانا ده‌ڤه‌رێ بێته ئاڤاكرن.
هەردیسان زێدەباری وێ چه‌ندێ كارێ يونيتادێ به‌ره‌ف داويێ ڤه دچت و ب هه‌زاران ديكيۆمێنتێن گرنگ و هه‌ستيار ل سه‌ر كه‌يسا ئێزديان و داعش دده‌ستێ وان دانه و پێشكێشى عيراقێ كرنه و عيراقێ ژى دڤێت ئه‌ڤ ئه‌ركێ وان ب داوى بێت وه‌كى داوى يا ئه‌ركه‌كى بێ ئه‌نجام ، ئه‌ڤێ چه‌ندێ وێ باندۆره‌كا خراب ل سه‌ر كه‌يسا ئێزديان هه‌بت.
خالەكا دن یا هەرا بهێز ئەوە ژێرخانا ئابووریا شنگالێ بێتە ڤەژاندن و ئاڤاكرن و د هەموو سیكتەران دا خزمەت بێتەكرن، قوربانی و رزگاربوویێن ژێر دەستێ رێكخراوا تیرۆرستی یا داعشێ بێنە قەرەبووكرن، زێدەباری پێكئينان و ئاڤاكرنا هێزەكا باوەرپێكری ژ خەلكێ شنگالێ ئەو ژی ب هەڤكاری دگەل هەرێما كوردستانێ و حكومەتا ناڤەندی و جڤاكا نێڤ دەولەتی و نافخۆیی داكو ئارامی ل دەڤەرێ بەربه‌لاڤ بت و هه‌روه‌سان داكو شنگال ژ كۆمكووژیان یە پاراستی بت.
سەرجەمێ كەسێن ب دەستێ تیرۆرستێن داعشێ ل رۆژا(15/8/2014)ێ هاتینە شه‌هيد كرن و بێ سەروشوونكرن(1211)كەسن و (400) زەلام ژ وان هاتن كوشتن و(19) كەس ژ كۆمكوژيێ رزگاربوون ، داعش خەلك د(22)گۆڕێن بكۆم دا گولەباران كرینە و دهەر گۆڕەكی دا ژمارەكا كەسان تێدایە، هەتا نۆکە، 11 گۆڕێن بکۆم هاتینە دیتن و 10 ژ وان هاتینە ڤەکرن بۆ بەلگەکرنا تاوانێ، د هەمان دەمدا، تنێ 30 مالبات ڤەگەریاينە دەڤەرێن باشوورێ شنگالێ، بێی کو ڤەگەڕنە کۆچۆ.