سه‌رۆك مەسعود بارزانى، په‌یامه‌ك ب هه‌لكه‌فتا 36 سالییا ئه‌نفالا بەھدینان به‌لاڤكر و تێدا ھاتیە؛ ئارمانجا ڤان تاوانێن ڕژێما بەرێ یا عیراقێ شكاندنا ئیراده‌یا گه‌لێ كوردستانێ بۆ پشته‌ڤانیكرنا شۆره‌شێ و درێژه‌پێدان ب سیاسه‌تا گوهۆرینا دیموگرافیا كوردستانێ بوو، پێدڤییه ده‌وله‌تا عیراقێ قه‌ره‌بوویا جینۆساید و تاوان و هه‌موو وان سته‌مان بكه‌ت یێن دژى ملله‌تێ كورد كرین.
هه‌روه‌سا سه‌رۆك بارزانى ئاماژه ب وێ یەکێ دا، ژ ئه‌نجامێ وێ تاوانێ ب هزاران وه‌لاتییێن كوردستانێ شه‌هید و بێ سه‌روشوون و ئاواره‌بوون و ب سه‌دان گوند ژى چۆلبوون.
سه‌رۆك بارزانى د پشکەکا دی یا په‌یاما خۆدا ڕاگەھاند، ل سالیادا ئه‌نفالا بەھدینان سلاڤان بۆ گیانێ پاقژێ شه‌هیدێن وێ تاوانێ و هه‌موو شه‌هیدێن كوردستانێ دهنێرن، ب توندى پێداگرییێ ل سه‌ر مافێن ڕه‌وایێن گه‌لێ كوردستانێ دكه‌ن، نابیت ئه‌ڤ تاوانه بهێنه ژبیركرن.