سه‌ما
ب بريارا مه‌سرور بارزانى، سه‌رۆكێ حكومه‌تا هه‌رێما كوردستانێ، هاريكاريا دارايى ل سه‌ر پتر ژ 3500 رزگاربوويێن ئێزدى ژ ده‌ستێ داعشێ، دێ ئێته به‌لاڤكرن.
ل رۆژا ئێك شه‌مبوويێ 4ى ته‌باخا 2024ێ، سه‌عيد جردۆ، سه‌رۆكێ ده‌سته‌يا بلندا بنگه‌هێ لالش يێ ڕه‌وشه‌نبيرى و كۆمه‌لايه‌تى د كونفرانسه‌كێ رۆژنامه‌ڤاني دا ل كۆمه‌لگه‌ها شاريا راگه‌هاند، رێككه‌فتى 2/7/2024ێ پرۆژێ پشته‌‌ڤانى يا دارايى ژبۆ رزگاربوويێن ژ ده‌ستێ داعشێ ژ ئاليێ رێزدار مه‌سرور بارزانى سه‌رۆكێ حكومه‌تا هه‌رێما كوردستانێ ڤه هاته راگه‌هاندن،ئيرۆ ژى ب شانازى ڤه ئه‌و پرۆژه كه‌فته دبوارێ بجهئينانێ دا و 3 هه‌زار و 575 رزگاربووى ژ كچ و ژن و زه‌لام و زارۆكان دێ مفادار بن.
سه‌عيد جردۆ ديار ژى كر، مينحه‌يا دارايى ژ مه‌ها هه‌شت يا ئيساله ده‌ست پێ دكه‌ت و رزگاربوويێن ژ ده‌رڤه‌ى وه‌لاتى ژى بخۆ ڤه دگرت،كو لينكه‌كێ تايبه‌ت ل سه‌ر پلاتفۆرمێن راگه‌هاندنا بنگه‌هێ لالش دێ ئێته به‌لاڤكرن و فۆرمێن خۆ داگرن.
سه‌رۆكێ بنگه‌هێ لالش گۆت ژى:مينحه‌يا دارايى ل ده‌ڤه‌رێن شاريا و خانكێ و شێخان و دێره‌بوونێ دماوێ چار رۆژان دا دئێته به‌لاڤكرن و ئيرۆ ل كۆمه‌لگه‌ها شاريا ده‌ست پێ كريه.
سه‌باره‌ت رزگاربوويێن ل شنگالێ ئاكنجى دياركر، ئه‌و رزگاربوويێن ل شنگالێ ئاكنجى دكارن سه‌ره‌دانا ليژنه‌يه‌كا تايبه‌ت بكه‌ن هاتيه ده‌ستنيشانكرن ژبۆ وه‌رگرتنا مينحه‌يا خۆ.
هه‌روه‌سا سه‌رۆكێ بنگه‌هێ لالش سوپاسيا حكومه‌‌تاهه‌رێما كوردستانێ كر و تايبه‌ت شه‌خسێ سه‌ر‌ۆك وه‌زيران مه‌سرور بارزانى بۆ ڤێ پێنگاڤا پيرۆز ژبۆ ده‌رمانكرنا برينێن رزگاربوويێن ژده‌ستێ داعش و خۆشكرنا بارێ ژين و ژياران وان.
د پشكه‌كادى يا گۆتنێن خۆ دا سه‌رۆكێ بنگه‌هێ لالش خوياكر، ل سه‌ر راسپارده‌يێن سه‌رۆكێ حكومه‌تێ،وه‌زيرێ په‌ره‌رده‌يا هه‌رێمێ برياره‌ك ده‌ركريه بۆ وان قوتابيێن هاتينه گرتن ژ كچ و كوڕان ل ده‌مێ جينۆسايدا ئێزديان ل 3/8//2014ێ ل سه‌ر ده‌ستێ تيرۆرستێن داعشێ،كو ئه‌و قوتابى نۆكه دكارن به‌رده‌واميێ بده‌نه خواندنا خۆ.
هه‌روه‌سا هه‌رمان ميرزا به‌گ، شێوه‌رمه‌ندێ سه‌رۆكوه‌زيران بۆ كاروبارێن ئێزديان دكۆنفرانسێ رۆژنامه‌ڤانى دا ڕاگه‌هاند،مينحه‌يا دارايى ئيرۆ ده‌ستپيكريه و پرۆژه‌كێ گرنگه بۆ رزگاربوويان ژبۆ كێمكرنا ئێش و ئازارێن وان،حكومه‌تا هه‌رێمێ ژى دێ به‌رده‌وام بت ل سه‌ر هاريكارى و پشته‌ڤانيكرنا ئێزديان.
پرۆسه‌يا به‌لاڤكرنا هاريكاريا دارايى تا رۆژا هه‌فتى مه‌هێ دێ به‌رده‌وام بت و هه‌موو رزگاربووى دێ هاريكاريێ وه‌رگرن.
