سه‌ما
شاره‌زايه‌كێ كاروبارێن ئۆلى دبێژت، هه‌تا نۆكه چ وێنه‌یه‌كێ زه‌لال نینه، سه‌باره‌ت پێگهۆرێ نیشتمانی بۆ تیمێ لێكۆلینێ یێ نێڤده‌وله‌تی “یونیتاد” ل عيراقێ.
د. سه‌عد سه‌لوم، شاره‌زايێ كاروبارێن ئۆلى بۆ سه‌ما راگه‌هاند، نه‌بوونا تێگه‌هشتنه‌كا زه‌لال هه‌یه سه‌باره‌ت سازى یان دامه‌زراوێن كو دكارن جهێ “یونیتاد” بگرن، بۆ ئه‌نجامدانا وان ئه‌ركێن پێ رادبوو، ژوان ژی مامه‌له‌كرن دگه‌ل به‌لگه و ديكیۆمێنتێن كو هاتینه كۆمكرن بۆ تاوانباركرنا رێكخراوا تیرۆرستيا داعش و به‌لگه‌داركرنا وان تاوانێن مه‌زن یێن كو وێ ئه‌نجام داین ژ جینۆساید و پاقژیا ره‌گه‌زی و تاوانێن دژی مرۆڤایه‌تیێ و تاوانێن شه‌ڕی د ده‌مێ كۆنترۆلكرنا پارێزگه‌ها نه‌ینه‌وا و ده‌ڤه‌رێن دی یێن عیراقێ.
ئاماژه ب وێ چه‌ندێ دا، پێدڤیه ئه‌لیت و چالاكڤانێن ئێزدی داخواز بكه‌ن بۆ دانانا ميكانیزمه‌كا نیشتمانی كو ببته پێگهۆره‌كێ كاریگه‌ر بۆ “یونیتاد”، و گۆت: ئه‌ڤ ميكانیزمه دڤێت بكارت به‌رده‌وامیێ بده‌ته وی كارێ كو تیمێ نێڤده‌وله‌تی ده‌ست پێكری و بكاربت به‌رپرسیارێن تاوانان ل دژی جڤاكێ ئێزدی و پێكهاتێن دی یێن جڤاكا عیراقێ پێشكێشی دادگه‌هێ بكه‌ت.
رۆنكر ژى، كو ئه‌ڤ پێگهۆره ببته دادگه‌هه‌كا تاوانان یا نێڤده‌وله‌تی، یان دادگه‌هه‌كا نیشتمانی، یان ژی دادگه‌هه‌كا تێكه‌ل كو هه‌م لایه‌نێ نێڤده‌وله‌تی و هه‌م یێ نیشتمانی تێدا هه‌بت بۆ دابینكرنا دادپه‌روه‌ری و لێپرسینێ.
دووپاتكر، كو ئه‌ڤه پێدڤی ب گوهۆڕین یان چاكسازیه‌كێ د ناڤه‌رۆكا یاسایی یا نیشتمانی دا هه‌یه، دا كو ئه‌نجامده‌رێن ڤان تاوانان وه‌ك ئه‌نجامده‌رێن جینۆسایدێ بێنه پۆلێنكرن، نه ته‌نها وه‌ك ئه‌ندامێن رێكخراوه‌كا تیرۆرستی، وه‌ك نۆكه هه‌یه.
ده‌رباره‌ى ڤێ پێنگاڤێ ژى گۆت: ئه‌ڤ چاكسازیا یاسایی گاڤه‌كا سه‌ره‌كی یه بۆ دابینكرنا دادگه‌هكرنه‌كا دادپه‌روه‌رانه و گشتگیر بۆ به‌رپرسیارێن تاوانێن كو دژی ئێزدیان هاتینه ئه‌نجامدان.