سه‌ما
وەرزێ نوی یێ خولا ئەلمانیا یا تۆپا پێ دەستپێکریە، و ئيرۆ یانەیا شتوتگارتێ پێشەنگییەکا دیرۆکی تۆمارکر ب گرێبەستکرنا دگەل یاریزانێ ئێزدی دەنیز ئۆنداڤ، یێ کو به‌هاترين یاریزانە د دیرۆکا یانەیێ دا، دێ پەیوەندی ب تیمێ ڤە کەت د گرێبەستەکێ دا کو بهایێ وێ گەهشتیە 26.70 ملیۆن یۆرۆيان، ئەڤە بلندترین بهایە کو شتوتگارتێ د دیرۆکا خۆ دا دایە بۆ کرینا یاریزانەکی.
دەنیز ئۆنداڤ، یێ 28 سالی، ژ مالباتەکا ئێزدی یە ژ باژێرێ رۆهایێ ل کوردستانا باکور، لێ ل ئەلمانیا هاتیە دنیایێ، و نهۆ نوونەراتیا هەلبژارتيێ ئەلمانیا دکەت، بەری نهۆ پەیوەندی ب یانەیا برایتۆن یا ئینگلیزی ڤە هەبوو، ل وێرێ رۆلەکێ بەرچاڤ د ئاستێ يانه‌يێ دا هەبوو.
د دەربرینێن بەرێ دا، ئۆنداڤ گۆت: “دەمێ پرسا ڤەگوهاستنێ هات، شتوتگارتێ هەولێن مەزن دان بۆ رازیکرنا من، و ئەز گەلەک خۆشحالم ب پەیوەندیبوونا ب ڤێ یانەیێ و ب گرێبەستێ ڤە.”
د وەرزێ بۆری دا، ئۆنداڤ 33 گۆل د هەموو پێشبرکیان دا تۆمارکرن، و سەرکەفت د تۆمارکرنا 19 گۆلان دا د خۆلا ئەلمانیا دا، دا ببتە چارەم گۆلکەرێ خۆلێ، سەرەرای پێشکێشکرنا 10 پاسێن بریاردەر.
ب سەدەما ئاستێ وی یێ تایبەت، هيڤی دئێتە کرن کو ئۆنداڤ کاریگەرییەکا مەزن ل سەر يانه‌يا شتوتگارتێ هەبت، کو نها دێ بەشداریێ د خۆلا قارەمانێن ئەورۆپا دا کەت د وەرزێ نهۆ دا.