سه‌ما
ل ڕۆژا 31/7/2024 دەست ب رێورەسمێن ئۆلی یێن جەژنا چلێ ھاڤینێ ل په‌رستگه‌ها لالش ھاتە کرن،ل رۆژا ئينيێ دبته جه‌ژن سەردەری و ديندارێن ئایینی رێورەسمان دگێڕن.
لوقمان سلێمان، به‌رپرسێ راگه‌هاندنا پەرستگەھا لالش بۆ سه‌ما دیارکر، پشتی 40 رۆژێن چلێ ھاڤینێ ب داوی دئێن، ئێزدی رۆژا داویێ دکەنە جەژن،ئێزدی قەستا پەرستگەھا لالش دکەن و د سەر پرا سەلاتێڕا دەرباز دبن، دچنە سەر حەودا کانیا سپی و دەست و چاڤێن خۆ پێ پاقژ دکەن، ھەر ئێزدیەکێ بچیتە پەرستگەھا لالش پێدڤیە ل کانیا سپی و دەریێ قاپیێ و زمزمێ و بەرێ شباکێ و نیشانگەھێن خاس و مەزارگەھێن ئایینی زیارەت بکەت.
گۆت ژى:ل ھەموو ئێڤاریان ژی سەما دئێتە کێشان و چرایێن ئاقد و نیشانگەھێن خاسا دئێنە ھەلکرن، رێورەسمێن قنتارێ دئێنە گێڕان، کەسێن نە مۆرکری ژی ب ئاڤا کانیا سپی دئێنە مۆرکرن ،ھەموو ئێڤاریان ژی بەیت و قەسیدە دئێنە گۆتن و سمات دئێتە چێکرن، ب ڤان رێورەسمێن ئایینى رێورەسمێن رۆژانێن جەژنا چلێ ھاڤینێ دئێنە گێڕان.
به‌رپرسێ راگه‌هاندنا پەرستگەھا لالش خوياژى كر،جەژنا چلێ ھاڤینێ ل 24 حوزەیرانێ دەست پێ دکەت هەتا 2/8 بۆ ماوێ سێ رۆژا رێورەسمێن جەژنێ ل پەرستگەھا لالش دئێنە گێڕان.
د ڤێ جەژنێ دا، ئەو کەسێن نەھاتینە مۆرکرن ب ئاڤا کانیا سپی دئێنە مۆرکرن، ژبەرکو ل نک ئاینێ ئێزدیان ئەڤە فەرزە.
چەندين رێورەسمێن جەژنێن ئێزدیان ل پەرستگەھا لالش دئێنە گێڕان، وەکو جەژنا چلێ زڤستانێ، جەژنا چلێ ھاڤینێ، جەژنا جەمایێ،جەژنا چلێ ھاڤینێ ئێک ژ وان جەژنێن ئێزدیانە ل پەرستگەھا لالش دئێتە کرن.