سه‌ما
سپێده‌هيا شەمبوويێ، 21-09-2024، مەسرور بارزانی، سەرۆکێ حکوومەتا هەرێما کوردستانێ، د رێورەسمەکێ دا، بەرێ بنیاتێ جووسایدێ شێخان-لالش، ل سنوورێ پارێزگەها دهۆکێ دانا.
سەرۆک وەزیرێ حكومه‌تا هەرێما کوردستانێ د گۆتارەکێ دا راگەهاند، ب تەمامبوونا هەردوو پرۆژێن رێکا شێخان – لالش و ئێتیت – باعەدرێ، کەرتێ ڤەگوهاستن و هاتن و چوونێ ل دەڤەرێ دێ ب باشی پێش کەڤت.
ب گۆتنا مەسرور بارزانی، تەمامبوونا جووتسایدێ شێخان – لالش، دێ گەلەک ئاسانکارییان ژ بۆ سەرەدانکەرێن لالشێ و هاتن و چوونا وەلاتیێن دەڤەرێ چێکەت، بەحس ل وێ ژی کر، دەڤەرا شێخان ژ ئالییێ “ئابووری، چاندنێ، گەشتیاری و شوێنەواری ڤە” گەلەک گرنگە.
وەک ئەوا سەرۆک وەزیران بەحس کری، دەڤەرا شێخان “نموونەیەکا گەلەک جوان یا کەلتۆرێ پێکڤەژیانێ یە ل هەرێما کوردستانێ، ئەم ب ڤی کەلتۆری و گیانێ ئێک قەبوولکرنێ جوانین و سەرێ مە ل هەموو جیهانێ پێ بلندە؛ لەوما هەر تشتێ ژ دەستێ مە بێت ژ بۆ خزمەتکرنا ڤێ دەڤەرێ، ئەم درێغی ناکەین”.
سەرۆکێ حکوومەتێ ته‌كه‌ز ل سەر وێ يه‌كێ کر “ئەم خزمەتکارێن خەلکێ خۆ نە، هیڤیدارم خودایێ مەزن پشتەڤان بیت و د هەموو رەوشان دا، ئەم دێ بەردەوام بین د کاروانێ ئاڤاکرنا کوردستانێ دا سەرەرای هەموو وان ئاستەنگ و رێگرییان یێن ل مە هاتینە کرن ژ بۆ وێ چەندێ کو ئەم نەشێین ئەجێندایا خزمەتکرنا خەلکێ هەرێما کوردستانێ جێبەجێ بکەین، لێ سوپاس بۆ خودایێ مەزن و ب پشتەڤانییا گەلێ خۆ یێ خۆراگر، ئەم بەردەوام بووین و دێ بەردەوام ژی بین”.
مەسرور بارزانی دووپاتکر “خویشک و برایێن ئێزدی، زێدەباری هەموو وان کارەسات، فەرمان و کۆمکوژییان یێن ب سەرێ وان دا هاتین، بەردەوامن د بەرگریکرنێ دا ژ زمان، کەلتۆر و ناسنامەیا خۆ. حکوومەتا هەرێما کوردستانێ دووبارە دکەت کو پابەندە ب پاراستنا مافێن خویشک و برایێن ئێزدی و هەموو هەولان د پێناڤ زێدەتر خزمەتکرن و کێمکرنا ئێش و ئازارێن وان دا دکەت”.
دەربارەی رێککەفتنا شنگالێ ژی، سەرۆک وەزیران گۆت: د هەولێن خۆ دا دگەل حکوومەتا فیدرال ژ بۆ ئاساییکرنا رەوشا شنگالێ ئەم بەردەوام ین ژ بۆ وێ چەندێ کو میلیشیا و گرۆپێن چەکدار ل شنگالێ نەمینن و ب رێڤەبرنا شنگالێ ژی بکەڤتە دەستێ خەلکێ رەسەن یێ دەڤەرێ؛ ئەڤە ژی تەنێ ب رێیا جێبەجێکرنا رێککەفتننامەیا شنگالێ دكارت بێتە کرن کو دێ رێخۆشکەر بت ژ بۆ دووبارە ئاڤاکرنا شنگالێ و ڤەگەریانا سەربلند یا ئاوارەیان”.
مەسرور بارزانی گۆتژی: کوردستان مالا خویشک و برایێن مە یە ل شێخان و دەڤەرێن دی ژی کو ژ بەر شەری یان هەر ئەگەرەکێ دی ئاوارە بووینە، سوپاسیا خەلکێ پارێزگەها دهۆکێ، شێخان و ڤێ دەڤەرێ دکەم کو دەرگەهێ مالێن خۆ ژ بۆ خویشک و برایێن خۆ ڤەکرن و نانێ خۆ دگەل وان پشك كرن.
سەرۆک وەزیران مەسرور بارزانی دووپات کر، “هەتا ئەم هەبین، ئەڤ وەلات، دێ وەلاتێ پێکڤەژیانێ بیت و دەرگەهێن مە ژ بۆ هەموو وان کەسان دێ ڤەکری بن یێن پێدڤی ب کوردستانێ هەی ژ بۆ پاراستنا ژیان و کەرامەتا خۆ”.