سه‌ما
سه‌رۆكێ ناڤه‌ندا ستراتیژی بۆ مافێن مرۆڤ ل عیراقێ راگه‌هاند، 27 ملیۆن دۆنم كو یه‌كسانه ب پازدێ ژ سه‌دێ روویێ عیراقێ بوویه بیابان، هه‌روه‌سا دبێژیت: سالانه 100 هه‌زار دۆنه‌مێن ئه‌ردى ل وه‌لاتى دبنه بیابان.
دكتۆر فازل غه‌راوی سه‌رۆكێ ناڤه‌ندا ستراتیژی بۆ مافێن مرۆڤ ل عیراقێ، ل روویپه‌لا خۆ یا سه‌ره‌كى ل تۆرا جڤاكى يا فه‌یسبووكێ راگه‌هاند، عیراق ل به‌ر مه‌ترسیه‌كا مه‌زن یا بیابانبوونێیه و 27 ملیۆن دۆنه‌مێن روویێ عیراقێ بوویه بیابان، كو یه‌كسانه ب نێزیكى پازدێ ژ سه‌دێ روویێ وه‌لاتى.
ئاماژه ب وێ يه‌كێ ژى كر، سالانه 100 هه‌زار دۆنه‌مێن ئه‌ردى ل وه‌لاتى دبنه بیابان و پێنجى و پێنج ژ سه‌دێ دى یێ ئاخا عیراقێ مه‌ترسیا بیابانبوونێ ل سه‌ره.
غه‌راوی ئاشكرا كر، كێمبوونا كه‌سكاتيێ كاریگه‌ریا راسته‌وخۆ ل سه‌ر ته‌ندرۆستیا مرۆڤى و مه‌ترسیا نه‌راسته‌وخۆ ل سه‌ر ئاسایشا خوارنێ هه‌یه، ئه‌و ژى به‌حسكر، ل گۆڕ خه‌ملاندنا رێكخراوا خوارن و چاندنێ یا سه‌ر ب نه‌ته‌وه‌یێن یه‌كگرتى، روویێ دارستانان ل عیراقێ 8 هزار و 250 كیلۆمه‌تر چارگۆشه پێك دئینن، كو دكه‌ته دوو ژ سه‌دێ روویێ وه‌لاتى.
هه‌روه‌سا داخواز ژ حكومه‌ت و هه‌موو پارێزگه‌هـ و دامه‌زراو و وه‌لاتیان كر كو د ماوه‌یێ 10 سالێن بێت دا هه‌وه‌كێ بۆ چاندنا 15 ملیار داران ژ جۆرێن به‌رده‌وام و به‌رگریا كه‌ش و هه‌وایێ ده‌ست پێ بكه‌ن دا بكارن وێ رێژه‌یێ زێده بكه‌ن.
فازل غه‌راوی دبێژت: ژ به‌ر گوهۆرینا كه‌ش و هه‌وایێ و خۆلبارینێ و كێمبوونا بارانێ و گه‌رمبوونا ئه‌ردى، رێژا روویێ كه‌سكاتيێ ل عیراقێ ژ 50% بۆ هه‌ڤدێ ژ سه‌دێ كێم بوویه.