سه‌ما
سەرۆکوەزیرێ هەرێما کوردستانێ، د هه‌لكه‌فتا وەرزشی یا دهۆکێ دا راگەهاند، “ئەم بخێرهاتنا مێڤانێن بەغدایێ دکەین و ئەز گەلەک خوشحالم کو د ڤێ هه‌لكه‌فتا وەرزشی دا ئامادەمە.”
ل رۆژا ئینيێ 20ى ئيلۆنا 2024ێ، مەسرور بارزانی، سەرۆکوەزیرێ هەرێما کوردستانێ، ل دهۆکێ، د دەمێ پێشکێشکرنا گوتارەکێ دا د ئاهەنگا ڤەکرنا وەرزێ نوو یێ خولا تۆپا پێ یا ستێرێن عیراقێ دا، راگەهاند، “ئەڤ هه‌لكه‌فته ئێكه‌م جارە کو ب ڤی شێوەیی ل هەرێما کوردستانێ تێتە ساز کرن و ئەز گەلەک خوشحالم کو ئيرۆ د ڤێ هه‌لكه‌فتا وەرزشی دا بەشدارم.”
سەرۆکوەزیرێ هەرێما کوردستانێ، بخێرهاتنا هەموو مێڤانان دکەت و هیڤیدارە هەموو لایەک ئێڤارەکا خوەش هەبن.
هەروەسا سەرۆکوەزیر مەسرور بارزانی، هیڤی خواست کو یانەیا دهۆکێ و زەورا ئەڤ شەڤ یاریەکا خوەش پێشکێش بکەن و ب دلێ هەموویان بیت، دبێژیت: هەر سەرکەفتی بن.
ژ لایێ خوە ڤە عەدنان درجال، سەرۆکێ فیدراسیۆنا تۆپا پێ یا عیراقێ، خوشحالیا خوە دەربڕی ب ئامادەبوونا سەرۆکوەزیر مەسرور بارزانی ل یاریگەهێ و دهه‌لكه‌فتێ دا، هەروەسا سوپاسیا حکومەتا هەرێما کوردستانێ کر ژ بۆ پشتەڤانیکرنا وێ ژ هه‌لكه‌فتێ.
عەدنان درجال هەروەسا سوپاسیا جەماوەرێ بەشداربووی کر ژ زاخۆ هەتا بەسرا ل یاریگەهێ دا و هیڤى خواست کو خۆلا ڤی سالێ ب بەراورد دگەل خۆلێن بۆرین پێشکەفتیتر و سەرکەفتیتر بت.
هەروەسا سەرۆکێ فیدراسیۆنا تۆپا پێ یا عیراقێ خواست کو خۆلا تۆپا پێ یا یانەیێن عیراقێ د پێشەرۆژێ دا ببتە باشترین ل سەر ئاستێ دەڤەرێ و وەلاتێن عەرەبی.