خــلمـەتـکـارێــن لالـشــێ
پير خه‌لات ئلياس
ئێزدیاتی هێڤێنێ بیر و باوەرێن کەڤنار یێن ئەزەلینە لەوما بێ گۆتن و بێ داخوازی کەسێن روح پاک تێنە لالشا نورانی خلمەتێ دکەن و هەر کەسێ خلمەتێ ل لالشێ بکەت ئەو دێ گەهتە مرازێ و لسەر دەمێ خاسان و باپچاکان و هەتا نهۆ بەردەوام خلمەتکار تێنە لالشێ و ب ئەینەتەکە پاک و دلەکی پڕ ئیمان و باوەری و خۆ بەخش دەست ب پاقژی و پاراستنا ساف هەیبەتێن لالشێ دکەن و ل هەر چار وەرزێن سالێ و ل هەموو رۆژێن ئینیا و چارشەمبووا خلمەتکار ژ دوور و نێزیک تێنە لالشێ و بتریا وان خەلکێ باشیک و بەحزانێ نە و دەڤەرێن جودا ژی بەژداریێ دکەن وەکا خلمەتکارێن: باشیکێ ـ بەحزانێ ـ خەتارێ – دۆغاتا – سرێچکا – مەهەتێ – بۆزا – شاریا – خانکێ – بابیرێ – ئێسیا – باعەدرێ – شێخکا – نسێریێ – ئێسڤنێ – شنگارێ …هتد. و خودێ خێر و خلمەتێن هەموان قەبول کەت مرازا هەموان بکەت.
ژ ئەدەبێ دینێ مە ئێزدیان دایە دیارکرن ژ قەولێ لاوکێ پیرا :
چی جێشەکی غەدارە
زەبێنی دکەنە کازی و هاوارە
مالا ئادیا وێ ژ مەستینن گونەهکارە
ئەڤەیە ماشێ مە خلمەتکارە .
ژ قەولێ خلمەتێ دەتە دیارکرن و دبێژت:
ژ قەولێ شێفەخرێ ئێزدینە
هەر یەب حەرفە و هەر یەب ناسینە
خلمەت روکنەکە ژ ئەرکانێت دینە .
ژ قەولێ هەفساری دبێژت :
خلمەتێ بکە و سەد سالی و زێدە
هەک لسەری هەیە فێتە
نیشان ئەوە ژ پێشڤە تێتە .
ژ قەولێ ئەبابەکێ ئۆمەرە دبێژت:
هنجیێ خلمەتا مالا ئادیا بکەت ژ دلە
ل دیوانا شیخادی و مەلک شێخسن دوەسلە
وەکا مەندێ شەریف و مەندێ تۆکلە.
ژ قەولێ ئێزی و مەدەهێ دبێژت:
هنجیێ لبەر قاپیا شیخادی بکەت خلمەتێ و عەبادەتێ
سلتان ئێزی دێ ماش و بەرات و خەلاتە دەتێ
بەلێ ژ خەزینا قودرەتێ .
