سه‌ما
دچارچۆڤێ هه‌وا ئاڤاكرنا لالشێ دا، نۆكه كار ل سه‌ر نووژه‌نكرنا مه‌زارگه‌هان و چه‌ند جهێن دى يێن پيرۆز ل په‌رستگه‌ها لالش دئێته كرن.
ل رۆژا سێ شه‌مبوويێ 10ى ئيلۆنا 2024ێ، ئه‌ندازيار خێرى گدى، ئێك ژ سه‌رپه‌رشتيارێن نووژه‌نكرنا په‌رستگه‌ها لالش بۆ سه‌ما راگه‌هاند: د چارچۆڤێ هەوا ئاڤاکرنا لالشێ دا و ب چاڤدێریا میر و ئەنجومەنێ ڕوحانی و ب سەرپەرشتیا کۆمیتا ئەندازیاری و بابێ چاویش و ب بەخشینا دراڤی ژلایێ خێرخوازان، كاركرن هه‌ردوو مه‌زارگه‌هێن خاتونا فه‌خرا و عه‌قدا كوچك بريم گەهشتیە قۆناغێن خۆ یێن داویێ، هه‌روه‌سا به‌رده‌وام كار ل سه‌ر ئاڤاکرنا مه‌زارگه‌هێ شێخ عەڤدال بسک دئێته كرن.
ئه‌ندازيار خێرى گدى ديار ژى كر: ژ پرۆژەیێن دى يێن ل لالش دئێنه ئه‌نجامدان چێكرنا رێيا گه‌ليێ لالش ب به‌رێن سروشتی دگەل ڕێيێن پیادە بۆ هاتن و چوونێ ، دگەل دیوارێن پشتەڤان و دوو جهێن فرين و دانانا هەلیکۆپتەران و چه‌ند کارێن دی، ئه‌ڤ پرۆژه ژى گه‌هشتيه قۆناغێن داويێ.
په‌رستگه‌ها لالش تاكه په‌رستگه‌ها پيرۆزا ئێزديانه، ئێزدى ل سه‌رانسه‌رى جيهانێ قه‌ست دكه‌نێ بۆ گێرانا رێوره‌سمێن ئۆلێ و جه‌ژن و هه‌لكه‌فتان.
ب پشته‌ڤانیا حكومه‌تا هه‌رێما كوردستانێ چه‌ندین پڕۆژه‌یێن خزمه‌تگوزاری ل په‌رستگه‌ها لالش هاتینه ئه‌نجامدان و بەردەوام كار بۆ پتر خزمەتكرنا لالشێ دئێتە كرن.
هه‌روه‌سا چه‌ندین مه‌زارگه‌هـ و جهێن ئاینی د ناڤ په‌رستگه‌ها لالش دا هاتینه نووژه‌نكرن، كو خێرخواز و رێكخراو ژی پشته‌ڤانیێ ل پڕۆژه‌یێ نووژه‌نكرنا په‌رستگه‌ها لالش دكه‌ن.
ئێزدیان هەشت جەژن هەنە، ژ وانا ژی: جەژنا سەرسالێ، جەژنا رۆژیێن ئێزی، جەژنا بیلندێ، جەژنا خدر ئلیاس، جەژنا قوربانێ، جەژنا چلێ هاڤینێ، جەژنا زڤستانێ و جەژنا جەمایێ نە.