سه‌ما
ل شنگالێ هێشتا 37 گۆڕێن ب كۆم يێن قوربانيێن ئێزدى نه‌هاتينه هلدان و مه‌ترسيا ژ ناڤچوونێ ل سه‌ر هه‌يه.
پرۆسه‌يا هلدانا گۆڕێن بكۆم ب شێوه‌يه‌كى سست ب رێڤه دچت و گه‌له‌ك روفاتێن قوربانيان ل پزيشكيا داد ل به‌غدايێ ماينه.
ل رۆژا ئێك شه‌مبوويێ 15ى ئيلۆنا 2024ێ،خه‌يرى عه‌لى، به‌رپرسێ رێكخراوا بتريكور بۆ مافێ مرۆڤى ل شنگالێ بۆ سه‌ما راگه‌هاند: ل سه‌رانسه‌رى شنگالێ 92 گۆڕێن بكۆم و تاكه‌كه‌سى يێن قوربانيێن ئێزدى ل سه‌ر ده‌ستێ تيرۆرستێن داعشێ هاتينه ديتن، ژ وانژى 55 هاتينه هلدان و 37 يێن دى ماينه، كارێ ڤه‌كرنا گۆڕان ب شێوه‌كى گشتى ب سستى ب رێڤه‌دچت و ڤێ چه‌ندێ كاريگه‌ريه‌كا نه‌رێنى و مه‌ترسيا ژناڤچوونێ ل سه‌ر هه‌يه.
به‌رپرسێ رێكخراوا بتريكور ئاماژه ب وێ چه‌ندێ دا پتر ژ 600رووفاتێن قوربانيان ل ڤان گۆڕێن بكۆم دا هاتينه ده‌رئێخستن و 242 روفات هاتينه ناسكرن و راده‌ستكرن بۆ كه‌سوكارێن وان و ب رێوره‌سمێن ئۆلى ڤه‌شارتينه، زێده‌بارى هێشتا گه‌له‌ك روفات ل پزيشكيا داد ل به‌غدا ماينه و ناسنامه‌يا قوربانيان ئاشكرا نه‌بوويه.
خه‌يرى دوپاتكر، ل وه‌رزێن زڤستان و هاڤينێ مه‌ترسى ل سه‌ر گۆڕان هه‌يه، دبت ئاڤ هه‌ستيكێن قوربانيان ل گه‌ل خۆ ببه‌ت يان ژى بێنه سۆتن يان گيانه‌وه‌ر ژى ببه‌ن،ئه‌ڤجا داخوازێ ل لايه‌نێن په‌يوه‌نديدار دكه‌ين له‌زێ ل هلدانا گۆڕێن بكۆم دا بكه‌ن.
تيرۆرستێن داعش ب سه‌دان وه‌لاتيێن ئێزدى يێن بێ گونه‌هـ د گۆڕێن بكۆم دا ل شنگالێ گووله بارانكرن و تاوانێن دژى مرۆڤايه‌تيێ ده‌رهه‌قى ئه‌واندا ئه‌نجامدان.