سه‌ما
ب نێزیكبوونا جه‌ژنا جه‌مایێ كو رێوره‌سمێن ل ده‌ستپێكا مه‌ها ئوكتۆبه‌رێ ده‌ست پێ دكه‌ن، ل په‌رستگه‌ها لالش به‌رهه‌ڤى بۆ پێشوازيكرنا ب هه‌زاران زياره‌تكه‌ران دئێنه كرن.
ب بريارا جڤاتا روحانى يا بلندا ئێزديان، ئيساله رێوره‌سمێن جه‌ژنا جه‌مايێ ل په‌رستگه‌ها لالش دێ ئێنه گێران.
ئيرۆ ئێك شه‌مبوويێ، 22ى ئيلۆنا 2024ێ، لوقمان سلێمان، به‌رپرسێ راگه‌هاندنا په‌رستگه‌ها لالش بۆ سه‌ما دبێژت: بۆ ئاماده‌كاریێن باشتر، دێ كۆمبوونه‌كا گرنگ ل ئێكى مه‌ها ئۆكتۆبه‌را بێت ئێته ئه‌نجامدان، ل ڤێ كۆمبوونێ دا دێ ئۆلدار و كه‌سايه‌تيێن ئێزدى و نوونه‌رێن ده‌زگه‌هێن حكومی به‌شداربن، دێ میكانیزمێن پێشوازیكرنا سه‌ره‌دانكه‌ران و پێرابوونێن جه‌ژنێ ل سه‌ر ئاستێن بلند ئێنه به‌رچاڤكرن و ئاشكراكرن.
لوقمان سلێمان دبێژت: ل رێككه‌فتى 6/1_13/2024 رێوره‌سمێن جه‌ژنێ ب پشكداريا ب هه‌زاران ئێزديان ل وه‌لات و ژ ده‌رڤه‌ى وه‌لاتى دێ ده‌ست پێ كه‌ن و بۆ ماوێ هه‌فتيه‌كێ به‌رده‌وام بن.
هه‌ر ب هه‌لكه‌فتا جه‌ژنا جه‌مايێ بۆ ماوێ هه‌فتيه‌كێ بۆ فه‌رمانبه‌رێن ئێزدى ل دام و ده‌زگه‌هێن حكومه‌تا هه‌رێما كوردستانێ دێ بێنڤه‌دانا فه‌رمى بت.
جه‌ژنا جه‌مایێ دبته درێژترین جه‌ژنا ئێزدیان، په‌یوه‌ندى ب سروشتى ڤه هه‌بوویه،رێوره‌سمێن ئه‌ڤێ جه‌ژنێ گرێداینه ب ده‌ستپێكا دیرۆكا ئێزدیاتیێ و سه‌رده‌مێ خوداوه‌ندان.
ژ رێوره‌سمێن هه‌ره دیار د ڤێ جه‌ژنێ دا قوربانیكرنا (گا)ى یه ئه‌وژى ژ بۆ خوداوه‌ندێ رۆژێ (شێشم / شێشمس)ــه كو د ئێزدیاتیێ دا مه‌زنترین خوداوه‌نده.