سه‌ما
رێڤه‌به‌ريا كاروبارێن ئێزديان ل دهۆكێ رادگه‌هينت، ل ماوێ بۆرى دا كار ل سه‌ر نووژه‌نكرن و چێكرنا هه‌ژماره‌كا مه‌زارگه‌هێن ئۆلى هاتيه كرن و حكومه‌تا هه‌رێما كوردستانێ گه‌له‌ك گرنگيێ ب مه‌زارگه‌هـ و نيشانگه‌هان ل هه‌موو ده‌ڤه‌رێن ئێزديان دده‌ت.
ل رۆژا دووشه‌مبوويێ 23ى ئيلۆنا 2024ێ، جه‌عفه‌ر سمۆ، رێڤه‌به‌رێ كاروبارێن ئێزديان ل دهۆكێ بۆ سه‌ما راگه‌هاند: حكومه‌تا هه‌رێما كوردستانێ چه‌ندين پرۆژه بۆ ده‌ڤه‌رێن ئێزديان ل په‌رستگه‌ها لالش ب رێکا ئیدارا پارێزگەها دهۆک و ب سه‌رپه‌رشتيا ليژنه‌يه‌كا ئه‌ندازه‌يى یا تایبەت ژجڤاتا رۆحانی یا ئێزديان ئه‌نجامداينه، ژوانژى پرۆژێ چێكرنا ده‌روازێ سه‌ره‌كى، جووتسايد، ئاڤ، جهێ گڤاشتنا زه‌يتوونان،عمبارا ئاڤێ ژ ئاليێ ده‌زگه‌هێ خێرخوازيێ بارزانى ڤه هاتيه ئه‌نجامدان، دانانا به‌رێ بنياتێ دووسايدكرنا رێكا لالش ژ شێخان هه‌تا په‌رستگه‌ها لالش.
جه‌عفه‌ر سمۆ، باس ل پشته‌ڤانى و چه‌ند هاريكاريێن دى يێن حكومه‌تا هه‌رێمێ دكه‌ت و دبێژت: ب رێكا وه‌زاره‌تا ئه‌وقاف و كاروبارێن ئايينى و رێڤه‌به‌ريا گشتى يا كاروبارێن ئێزديان، چه‌ندين جهـ و مه‌زارگه‌هێن پيرۆزێن ئێزديان پێدڤى ب نووژه‌نكرنێ بووينه، هاتينه نووژه‌نكرن و سه‌خبێركرن.
ئاماژه ب وێ چه‌ندێ دا، درێژه‌پێدان ب خزمه‌تكرنا جهێن پيرۆزێن ئێزديان، مه‌زارگه‌هێ مه‌همه‌دێ جندار ل خانكێ هاتيه په‌رژانكرن، چه‌ند كه‌لوپه‌لێن كاروبارێن ئۆلى بۆ گوندێ كه‌رانێ و كورسيك بۆ هۆلا تازيان ل دێره‌بوونێ هاتينه كڕين.
راگه‌هاند ژى، ب پشته‌ڤانى يا رێزدار مه‌سرور بارزانى، سه‌رۆكێ حكومه‌تا هه‌رێما كوردستانێ مه‌هانه هاريكاريه‌كا دارايى پێشكێشى ئۆلدارێن ئێزدى دكه‌ت ب رێكا رێڤه‌به‌ريا كاروبارێن ئێزديان.