سه‌ما
حکومەتا عیراقێ، رۆژا دووشەمبێ، راگەهاند کو نامەیەکا نەرازیبوونێ یا فەرمی پێشکێشی سکرتێرێ گشتی یێ رێکخراوا نەتەوێن ئێکگرتی و ئەنجومەنا ئاسایشا نێڤدەولەتی کریە.
نامە دهەڤگرتی ئیدانەکرنا “بنپێکرنا ئاشکرا” یا کو ئیسرائیلێ ب فڕۆکێن خۆ یێن “دەستدرێژکەر” کریە سەر ئاسمانێ عیراقێ و سەروەریا وێ، و بکارئینانا ئاسمانێ عیراقێ بۆ ئەنجامدانا هێرشێ ل سەر کۆمارا ئیسلامی یا ئیرانێ، ل 26ێ تشرینا ئێکێ.
سەرۆک وەزیران محەمەد شیاع سودانی فەرمان دا وەزارەتا دەرڤە کو پەیوەندیێ ب لایێ ئەمریکی را بکەت، دەربارەی ڤێ بنپێکرنێ، ل دویڤ بەندێن رێککەفتنا چارچۆڤێ ستراتیجی یا دووقۆلی، و پابەندبوونا ئەمریکا ب ئاسایش و سەروەریا عیراقێ ڤە.
حکومەتا عیراقێ د بەیانەکێ دا دوپاتى ل سەر پابەندبوونا خۆ یا جێگیر ب سەروەری و سەربەخۆیی و پیرۆزیا ئاخا عیراقێ، و کو ئەو ل سەر هەموو ئاستان کار دکەت بۆ رووبەرووبوونا ڤان بنپێکرنان، و دوپات دکەت سەر نەهێلانا بکارئینانا ئەسمان یان ئاخا عیراقێ بۆ دەستدرێژی سەر وەلاتێن دی، ب تایبەت وەلاتێن جیران یێن کو پەیوەندیێن رێزگرتن و بەرژەوەندیێن هەڤپشک ب عیراقێ را هەین.