كوردستان 24:
كابینه‌یا نه‌هێ یا حكومه‌تا هه‌رێما كوردستانێ ب سه‌رۆكاتیا مه‌سرور بارزانی، د ره‌وشه‌كێدا ده‌ست ب كار بوو، كو گه‌له‌ك ئاسته‌نگ ل سه‌ر هه‌رێما كوردستانێ هه‌بوون، دگه‌ل هندێ ژی، شیا بهێته سه‌ر هه‌می ڤان ئاسته‌نگان و زۆرترین ئاسته‌نگێن به‌رامبه‌ر كه‌رتێن جودا چاره‌سه‌ر بكه‌ت.
هه‌روه‌سا هه‌می ئه‌و بابه‌تێن كو په‌یوه‌ندی ب خزمه‌تكرنا هه‌ڤوه‌لاتیان و ئه‌وێن لایه‌نێ مرۆڤی و جڤاكی هه‌ین، د ماوێ ڤێ كابینێدا به‌رگه‌كێ نوی ل به‌ر كرن و شیان گاڤێن مه‌زن د ڤی واریدا باڤێژن، ژ وان ژی، بهێزكرنا پێكڤه‌ژیانێ، راگهاندن، رێكخراوێن نه‌حكومی، ئاواره و په‌نابه‌ر و شۆركرنا ده‌سته‌لاتان.
ب دروشمێ كوردستانه‌كا بهێز، كابینه‌یا نه‌هێ یا حكومه‌تا هه‌رێما كوردستانێ ب سه‌رۆكاتیا مه‌سرور بارزانی ل 10ێ تیرمه‌هێ سالا 2019 پێك هات.
ئه‌ڤ كابینه ژ 19 وه‌زاره‌ت و 12 فه‌رمانگه‌هـ و ده‌سته‌یێن نه‌گرێدای ب وه‌زاره‌تان پێك دهێت و دگه‌ل وان ئاسته‌نگ و گرفتارێن ئابووری و سیاسی یێن ل به‌رامبه‌ر وێ هه‌بوون، ده‌ست ب كارێن خوه كر و شیا گاڤێن مه‌زن د واری رێكخستن و چاكسازیێدا باڤێژیت. ئه‌و بابه‌تێن كو په‌یوه‌ندی ب خزمه‌تا هه‌ڤوه‌لاتیان ڤه هه‌بوون، به‌رگه‌كێ نوی ل به‌ر كرن و په‌یوه‌ندیا ناڤبه‌را حكومه‌تێ و جڤاكێ و خزمه‌تگوزاریان بۆ هه‌ڤوه‌لاتیان چوونه قۆناغه‌كا پێشكه‌فتیتر و چه‌ندین وار د ڤێ چارچوڤێدا گرتنه‌ڤه.
ئه‌و ژی ئه‌ڤه بوون:
وارێ پێكڤه‌ژیانێ: د ده‌مه‌كیدا كو هه‌شت پێكهاتێن ئایینی و ئۆلی ل هه‌رێما كوردستانێ هه‌نه، ئه‌ڤ كابینه‌یه شیایه 457 جهێن ئایینی ئاڤا بكه‌ت.
وارێ راگه‌هاندنێ: ل سه‌ر چه‌سپاندن و بهێزكرنا بنه‌مایێ دیموكراسیێ و ئازادیان و رۆژنامه‌ڤانیێ بۆ هه‌می رۆژنامه‌ڤانان ب گۆر یاسا و رێنمایان هاتیه ره‌خساندن، ل هه‌رێما كوردستانێ 126 كه‌نالێن ناڤخۆیی، 31 كه‌نالێن ئاسمانی، 176 رادیۆ، 121 مالپه‌رێن ئه‌له‌كترۆنی و 988 رۆژنامه و كۆڤار ب ئازادی كار دكه‌ن.
وارێ رێكخراوێن نه‌حكومی: ل كوردستانێ 5001 رێكخراوێن ناڤخۆیی و بیانی هاتینه تۆماركرن و زه‌مینه‌یێ كاری د وارێن جودادا بۆ وان هاتیه ره‌خساندن.
د وارێ ئاواره و په‌نابه‌راندا: پێشكێشكرنا هاریكاریا مرۆڤی ب بهایێ 842 ملیۆن دۆلارێن سالانه بۆ پتر ژ ئێك ملیۆن ئاواره و په‌نابه‌ر د 31 كه‌مپاندا ل هه‌رێما كوردستانێ.
وارێ شۆركرنا ده‌سته‌لاتان یان ژی لامه‌ركه‌زی: سه‌رۆكێ حكومه‌تا هه‌رێما كوردستانێ بریار دا د چارچوڤه‌یا لامه‌ركه‌زیه‌تێدا ده‌سته‌لاتێن كارگێری و دارایی بۆ پارێزگه‌ه و ئیدارێن سه‌ربه‌خوه بهێنه شۆركرن، هه‌ر د ڤێ چارچوڤێدا هه‌ر ئێك ژ ئیدارا سه‌ربه‌خوه یا سۆرانێ و ئیدارا سه‌ربه‌خوه یا زاخۆ و ده‌هان به‌رێڤه‌به‌ریێن خزمه‌تگوزاریێن نوی بۆ هێسانكرنا راپه‌راندنا كارێن هه‌ڤوه‌لاتیان هاتنه دامه‌زراندن.