سەما تیڤی

حەیدەر شەشۆ بۆ سه‌ما: پێدڤیە بەغدا ميکانیزمەکێ بۆ بجهئينانا رێککەفتنا شنگالێ ب دانێت

ناڤەندا نووچەیان – سەما
فەرماندێ هێزا پاراستنا ئێزیدخانێ ل شنگالێ راگه‌هاند، شەڕ و ئالۆزیێن دناڤبەرا سوپايێ عیراقێ و لایەنێن سیاسی دا پەیدا دبن ب چ ئاوايەکی د خزمەتا خەلکێ شنگالێ دا نینن و دبته‌ سه‌ده‌م رەوشا دەڤەرێ هەلاویستی بمینت.

د چەند رۆژێن دەربازبوویی دا ل سەنتەری باژێرێ شنگالێ شەڕ و ئالۆزی دناڤبەرا سوپايێ عیراقێ و هێزێن یەبەشێ دا پەیدابوو، پشتی سێ ڕۆژان ژ ئالۆزییان، رێککەفتن دناڤبەرا هەردوو ئالیان دا هاتە کرن ل سەر وی بنیاتی جارەک د یتر ئالۆزی پەیدا نەبن.

حەیدەر شەشۆ، فەرماندێ هێزا پاراستنا ئێزیدخانێ تايبه‌ت بۆ سەما گۆت: “ئەڤ شەڕ و ئالۆزیێن ل سەر ئاخا شنگالێ دناڤبەرا سوپايێ عیراقێ و لایەنێن سیاسی دا پەیدا دبن ب چ ئاوايەکی د خزمەتا خەلکێ شنگالێ دا نینن، بەلکو ئەڤ چەنده‌ دبتە سەدەم هەر رەوشا دەڤەرێ هەلاویستی بمینت و ڤەگەریانا ئاوارەیان ژی بێتە پاشێخستن.”

شەشۆ ئاشكراكر:” پێدڤیە حکومەتا عیراقێ پێنگاڤێن دروست ژبۆ چارەسەرکرنا کەیسا شنگالێ بهاڤێژت و باشترین چارەسەری ژی بجهئینانا ڕێککەفتنێ يه و خەلکێ شنگالێ بریارا خۆ بدەت و خودان دەستهەلات بن ل دەڤەرا خۆ و میکانیزمێن رێککەفتنێ وەک هەین بێنە بجهئینان و د بەرژەواندییا خەلکێ دا بن.

پشتی هێرشا رێکخراوا داعش تیرۆرستی بۆ سه‌ر شنگالێ ل ته‌باخا٢٠١٤، مەیدانا قەزا شنگالێ ل سنوورێ پارێزگەها نەینەوا بارودۆخەکێ جێواز ب خۆ ڤە دیت دناڤبەرا ئالیێن سیاسی یێت جودا جودا دا.

ل هەیڤا ١٠ یا سالا ٢٠٢٠، رێککەفتنەک دناڤبەرا حکومەتا عیراقێ و هەرێما کوردستانێ دا هاتە ئيمزاکرن ژبۆ ئاسایيکرنا ره‌وشا شنگالی ژ روویێ ئەمنی و کارگێری ڤە.

ئێك ژ به‌ندێن وێ رێككه‌فتنێ ڤەگەراندنا ئاوارەیان و ئاڤه‌دانکرنا دەڤەرێ بوو، لێ هەتا نهۆ پتریا به‌ندان وەکو خۆ و هەلاویستی ماینە.

><