سه‌ما
قەبارێ گشتی یێ ئاڵوگۆرا بازرگانی یا د ناڤبەرا عیراق و توركیایێ دا بۆ ساڵا 2023ێ، سەر 20 ملیار دۆلارە و توركیا دخوازیت قەبارێ وێ زێدەتر بلند بكەت و هاتیە پێشبینیكرن كو ئەڤساڵ دێ زێدەتر بیت.
عومەر پولات وەزیرێ بازرگانیێ یێ توركیایێ، بریارە ب هەڤرێیا شاندەكێ بلند یێ بازرگانی یێ وی وەڵاتی سەرەدانا عیراقێ بكەت.
ل گۆر “ئێنێرژی پرێس” محەمەد حەنوون بێژەڤانێ وەزارەتا بازرگانیێ یا عیراقێ رایگەهاندیە، شاندێ توركیایێ بریارە ل 18 و 19ێ ڤێ هەیڤێ سەرەدانا عیراقێ بكەت.
سەرەدانا وان ل سەر گازیكرنا محەمەد تەمیم هاریكارێ سەرۆك وەزیران و وەزیرێ پلاندانانێ یێ عیراقێ یە، دگەل وەزیرێ ئاڤادانكرنێ و نیشتەجێكرنێ و وەزیرێ ژێدەرێن ئاڤێ یێ توركیایێ و كۆمپانیێن بوارێ بەلێندەرایەتیێ یێن تركیایێ دێ كۆمبوونان كەن.
توركیا وەسا دبینیت كو عیراق ئێك ژ گرنگترین هەڤپشكێن وێ یێن بازرگانی یە ل دەڤەرێ، لەوما حەز دكەت پەیوەندیێن خوە یێن بازرگانی و ئابووری دگەل عیراقێ زێدەتر پێشڤە ببەت.
قەبارێ گشتی یێ ئاڵوگۆرا بازرگانی یا د ناڤبەرا عیراق و توركیایێ دا، سەر 20 ملیار دۆلارە و هزار و 101 پرۆژە ب بەهایێ 34 ملیار و 600 ملیۆن دۆلاری ل عیراقێ جێبەجێ كرینە.
پێدڤیە بێتە گۆتن كو هەرێما كوردستانێ د ڤێ ئاڵوگۆرا بازرگانی دا رۆلەكێ سەرەكی دلیزیت، ژ بەر كو هەمی ئەو كەلوپەلێن ژ تركیایێ تێنە عیراقێ، ژ هەرێما كوردستانێ دەرباز دبن، هەرچەندە دیار نینە كا شاندێ تركیایێ دێ سەرەدانا هەولێرێ ژی كەت یان نا.