سه‌ما
مه‌زارگه‌هێ شێخێ زەری كو دبته ئێك ژ كه‌ڤنترين مه‌زارگه‌هێن ئۆلى ل ناحيا خانكێ، دووباره ده‌ست ب نووژه‌نكرن و قۆناغا ئاڤاكرنا وى هاتيه كرن.
صباح سمير،ژ مالباتا شێخ سمير شێخ جۆزل بۆ سه‌ما دبێژت: قوبا شێخێ زەری ل سالا1982 ب گێچێ و به‌ران هاتبوو ئاڤاكرن، پشتى گه‌له‌ك كه‌ڤن بووى و بۆ هندێ جاره‌كا دى بێته نووژه‌نكرن ره‌زامه‌نديا ده‌سته‌كا گوندێ ربێبيێ وه‌رگرت و ب به‌خشينا خه‌لكێ گوندى و خێرخوازێن ئێزدیان ليژنه‌يه‌ك بۆ كۆمكرنا هاريكاريا دارايى هاته پێكئينان، ل رێككه‌فتى 12/9/2024ێ ب ئاماده‌بوونا بابێ شێخێ و کۆمەکا کەسایەتی و ریهـ سپى و مجێور، ب دوعا و درۆزا خاسا دەست ب ڕێورەسمێن نووژەنکرنێ ب چه‌ند قۆناغان هاتەکرن.
گۆتژى: وه‌كو مالباتا شێخ سمير سه‌رپه‌رشتيا نووژه‌نكرنێ دكه‌ين و نۆكه قۆناغا حه‌لانكرنێ ده‌ستپێكريه و ب شێوازه‌كێ جوان و كه‌ڤنار وه‌كى خۆ ده‌ستپێكريه كو ده‌ربرينێ ژ كه‌ڤنار يا مه‌زارگه‌هى دكه‌ت، هه‌روه‌سا قوبا وى مه نه ئێورانديه وه‌كو خوه مايه هاتيه پاراستن.
صباح سمير دا زانين ژى: ده‌مێ قۆناغا نووه‌ژنكرنێ ب داوى تێت، دێ ده‌ست ب دروستكرنا ده‌ردۆرێن مه‌زارگه‌هى كه‌ين ب شێوازەکی جوان.
قوبا شێخێ زەری ل سه‌ر ده‌ستێ خودێ ژێ رازى شێخ زه‌يدين شێخێ شه‌مسايه دبته بابێ قه‌ولبێژ شێخ ده‌شتى، ل 15/6/1982 هاتيه ئاڤاكرن.
ل هه‌موو گوند و ده‌ڤه‌رێن ئێزديان نيشانگه‌هـ و مه‌زارگه‌هێن پيرۆزێن ئۆلى هه‌نه، خه‌لك به‌رده‌وام سه‌ره‌دانا ئه‌وان دكه‌ن و هيڤى و دوعايا دخوازن.