سه‌ما
ئێڤارييا ئيرۆ پێنج شه‌مبوويێ 31ى تشرينا ئێكێ 2024ێ، ل باره‌گايێ بنگه‌هێ لالش ل دهۆكێ دانوستاندن ل دۆر كۆچبه‌ريا ئێزديان و پێكهاتێن دى ئه‌گه‌ر و چاره‌سه‌رى هاته كرن.
دچارچۆڤێ پێنج شه‌ما ره‌وشه‌نبيرى دا و ب ئاماده‌بوونا هه‌ژماره‌كا ئه‌كاديمى و كه‌سايه‌تى و ره‌وشه‌نبيران، بنگه‌هێ لالش ل دهۆكێ دانوستاندنه‌كا ڤه‌كرى ل دۆر(كۆچبه‌ريا ئێزديان و پێكهاتێن دى ئه‌گه‌ر و چاره‌سه‌رى) بۆ جه‌هوه‌ر سلێمان، راوێژكارێ به‌رێ يێ جڤاتا رۆحانيا ئێزديان رێكخست.
راوێژكارێ به‌رێ يێ جڤاتا رۆحانيا ئێزديان باس ل قۆناغێن كۆچبه‌ريا ناڤخۆيى و ده‌ره‌كى يا ئێزديان كر و دياركر، کۆچبەری گرێدایە ب مان و نەمانا کەلتۆر و دیرۆک و هەبوونا ئێزدیان، چ ل ڤێدەر يانژى ل دەرڤەی وەلاتی بت.
جه‌هوه‌ر سلێمان، جه‌خت ل كاريگه‌ريێن كۆچبه‌ريێ ل سه‌ر ئێزديان كر و گۆت: ژيان يا ب زه‌حمه‌ته بۆ هه‌ر كه‌سه‌كێ كۆچبه‌رى وه‌لاته‌كێ دى ببت، ره‌نگه داب و نه‌ريتێن خۆ يێن ئۆلى و جڤاكى ژده‌ست بده‌ن.
ئاماژه ب وێ چه‌ندێ دا ئێزدى ل ده‌رڤه پێدڤى ب لۆبيه‌كى هه‌نه داكو پتر بكارن كه‌يسا جينۆسايدێ بگه‌هيننه وه‌لاتێن جيهانێ.
پاشان ده‌رگه‌هێ دانوستاندنێ هاته ڤه‌كرن و ئاماده‌بوويان چه‌ند پرسيار ئاراسته كرن و به‌رسڤ ل سه‌ر هه‌موويان هاته دان.
ل هه‌موو رۆژێن پێنج شه‌مبوويان دانوستاندانه‌كا ڤه‌كرى ژلايێ بنگه‌هێ لالش بۆ ره‌وشه‌نبيران ل دۆر مژاره‌كا گرنگ يا ئێزديان دئێته ل دارخستن.
دڤێ چالاكيێ دا ته‌وه‌رێن گرنگ دئێنه گۆتۆبێژكرن و بۆچۆن و پێشنيارێن كه‌سايه‌تى و ره‌وشه‌نبيران ل به‌رچاڤ دئێنه وه‌رگرتن.