سه‌ما
وشیان خدێدا ئومۆ، به‌ربژارا كوردێن ئێزدى بۆ هه‌لبژارتنێن په‌رله‌مانێ كوردستانێ ئاماژێ ب وێ چه‌ندێ دكه‌ت، هه‌ر قانوونه‌كا مافێن ئێزدیان بن پێ بكه‌ت دێ كار ل سه‌ر كه‌ین بۆ ده‌ستڤه‌ئینانا مافێن ئێزدیان و خێزانێن شه‌هیدێن سه‌ربلند و پێشمه‌رگه‌یى.
وشيان خدێدا، به‌ربژارا ژماره 48 ل سه‌ر لیستا 190یا پارتى ديموكراتى كوردستان بۆ هه‌لبژارتنێن خۆلا شه‌شێ يێن په‌رله‌مانێ كوردستانێ بۆ سه‌ما گۆت: وه‌كو كارێ په‌رله‌مانى كارێ سه‌ره‌كێ دارشتن و ده‌رئێخستنا قانوونایه گه‌له‌ك قانوون ژ په‌رله‌مانێ كوردستانێ ده‌رچووینه و گرنگى ب ئێزدیان هاتیه دان، لێ كێماسى تێدا هه‌نه، دێ كار بۆ نه‌هێلانا كێماسیان كه‌ین، په‌یاما مه بۆ هه‌موو ده‌نگده‌رێن ئێزدى ئه‌وه پێكڤه رۆژا 20/10/2024ێ بچنه سه‌ر سه‌ندۆقێن ده‌نگدانێ و ده‌نگ ب لیستا پێكڤه‌ژیانێ و ئاڤه‌دانى و ئارامى و ته‌ناهى و خۆراگریێ لیستا 190 بده‌ن و تاكه به‌ربژارا ئێزدیان یا ژمارا 48 دێ ب ده‌نگێن ئێزدیان ل په‌رله‌مانى كار بۆ گه‌ره‌نتیكرنا مافێن ئێزدیان و ژیانه‌كه به‌خته‌وه‌ر و ئاینده‌كێ گه‌ش و یه‌كسانى و پێكڤه‌ژیان و دادپه‌روه‌رى و سه‌روه‌ریا قانوونێ كه‌ین، هه‌موو كاران بۆ گه‌ره‌نتیكرنا مافێن ئێزدیان ل په‌رله‌مانێ كوردستانێ دێ كه‌ین و ناهێلین چو غه‌در ل ئێزدیان بێته كرن كو سه‌رۆك بارزانى و هه‌موو كابینه‌یێن حكومه‌تا هه‌رێما كوردستانێ پشته‌ڤانیێ ل ئێزدیان دكه‌ن دێ به‌رده‌وام بین”.
سه‌رۆك بارزانى و هه‌موو كابینه‌یێن حكومه‌تا هه‌رێما كوردستانێ پشته‌ڤانیێ ل ئێزدیان دكه‌ن
به‌ربژارا ئێزدى دبێژت: هه‌ر ل خۆلا ئێكێ یا په‌رله‌مانێ كوردستانێ ئێزدیان جهێ خۆ ل په‌رله‌مانى هه‌بوویه، وه‌كو دیرۆك جهێ شانازییه لێ بۆ ب ده‌ستڤه‌ئینانا مافان پێدڤیه ئێزدى هێشتا كار بكه‌ن ئه‌و ژى ب ریێا په‌رله‌مانى و ده‌رئێخستنا قانوونان.
ناڤهاتيێ دوپاتكر، دێ كار كه‌ین ده‌ڤه‌رێن ئێزدیان بكه‌ڤنه د ناڤ پلانێن ستراتیژى دا بۆ گه‌شه‌پێدانا ئابوورى و ده‌ڤه‌رێن ئێزدیان نه‌ئێنه بێ به‌هركرن و پتر خزمه‌تگۆزارى بگه‌هنه ده‌ڤه‌رێن وان ل سنوورێ پارێزگه‌ها دهۆكێ، دیسا بۆ خۆشكرنا ژیانا پێشمه‌رگه‌یى هێمایێ سه‌رفرازیێ و خێزانێن سه‌ربلندێن شه‌هێدان دێ كار كه‌م و هه‌موو بزاڤان بۆ باده‌كا جینۆسایدا ئێزدیان و پتر ناساندنا كه‌یسا جینوسایدا ئێزدیان ل سه‌ر ئاستێ جیهانێ ل په‌رله‌مانێ كوردستانێ دێ كه‌ین.