هه‌لبژارتنێن په‌رله‌مانی یێن هه‌رێما كوردستانێ نێزیك دبن، و وێنێن به‌ربژێران ژ پارتیێن جودا و سه‌ر ب گروپێن جودا ل سه‌رانسه‌ری هه‌رێمێ به‌لاڤ دبن، ئه‌ڤه هه‌ڤركییا هه‌لبژارتنایه و ئاسایی یه و نیشانا پراكتیزه‌كرنا دیموكراسیێ یه، د ڤی كه‌شوهه‌وایی دا به‌ربژێر سۆزێ ددن ئه‌گه‌ر سه‌ركه‌فتن به‌رنامێن خۆ یێن د بانگه‌شا هه‌لبژارتنان دا ئاشكه‌را دكه‌ن جێبه‌جێ بكه‌ن، هه‌روه‌سان هنده‌كێن دیتر ئاماژێ ب پێتڤی یا چاره‌سه‌ركرنا نه‌رێنێن د نۆكه‌دا هه‌ین ددن، له‌وران ره‌خنێن ئاڤاكه‌ر پێدڤینه بۆ باشتركرنا ره‌وشا مه د ناڤچه‌یێ دا.
د سه‌رده‌مێ مه یێ نها دا، كو زانیاری و وێنه ب له‌زاتیه‌كا بێ وێنه دئێنه ڤه‌گوهاستن، وه‌لاتی ب رێیا هه‌ڤدیتنێن ته‌له‌ڤزیونی و دیالوگێن ڤه‌كری یێن به‌ربژێران گۆهـداریێ دكه‌ن و دبینن، پرسیار دئێنه كرن ده‌رباره‌ی به‌رنامێن هه‌لبژارتنێ یێن پارتی و لیستان، و كا چ دكارن بكه‌ن بۆ ب هێزكرنا هه‌رێمێ و باشتركرنا ره‌وشا وێ.
لێ دڤێت ئه‌م هشیار بین كو هه‌رێما كوردستانێ ب ئاسته‌نگێن مه‌زن دورپێچكریه و دژمن دخوازن سنورێن وێ ب به‌زینن و رۆلا وێ كێم بكه‌ن و سنووردار كه‌ن، ئه‌ڤ چه‌نده ژی بۆ هه‌موویان دیاره، كورد راستی پارچه‌كرنه‌كا دژوار بوون ژ ئالیێ سیسته‌مێن ده‌ڤه‌رێ ڤه، و هه‌رێم ئه‌و قه‌واره‌یه كو كوردان ل ڤێ ده‌ڤه‌را جوگرافی كۆم دكه‌ت، له‌وما پاراستنا هه‌رێمێ و به‌رگریكرن ژ سنورێن وێ واته پاراستنا ناسنامه و پاشه‌رۆژا كوردستانێ، سه‌ركردێن هه‌رێمێ ب سه‌رۆكاتییا سه‌روك مه‌سعود بارزانی كار دكه‌ن ژ بۆ چه‌سپاندنا ڤێ ناسنامێ و ب هێزكرنا قه‌وارێ هه‌رێمێ، و دڤێت ئه‌م هه‌موو د ئاستێ به‌رپرسیاریا ڤێ ئه‌ركێ دابین.
هه‌لبژارتن نه‌بتنێ هه‌لبژارتنا نوێنه‌رانه د په‌رله‌مانێ دا، به‌لكو ئامرازه‌كه بۆ پاراستن و خزمه‌تكرنا هه‌رێمێ، ل كوردستانێ گه‌له‌ك نه‌ته‌وه و ئولێن جودا پێكڤه دژین دڤێت ئه‌م ڤێ پر ره‌نگیێ ب پارێزین و ب هێز بكه‌ین، هه‌رێم ئه‌و ماله یه كو مه كۆم ڤه دكه‌ت و ئه‌منیه‌ت و سه‌قامگیریێ ژ مه را په‌یدا دكه‌ت د ناڤ ده‌ڤه‌ره‌كێ دا كو ته‌نگاڤی و شه‌ڕ لێ هه‌نه، ئه‌ڤ سه‌قامگیریه سه‌ره‌رایی ئاسته‌نگان، دڤێت بێته پاراستن و به‌رده‌وام ب هێز بكرن.
سه‌ره‌رای هنده‌ك لایێن نه‌رێنی وه‌ك گه‌نده‌لی، نابت ئه‌م ب تنێ ل سه‌ر كێماسیان راوه‌ستین و چاڤێن خوه ژ ده‌ستكه‌فتان پشتگۆهـ پاڤێژین، ره‌وشا هه‌رێمێ گه‌له‌ك باشتره به‌رامبه‌ر وه‌لاتێن دورهێلێ یێن كو راستی توندوتیژی و نه‌سه‌قامگیریێ هاتین، له‌وما ئه‌ركێ مه یه كو ئه‌م یا هه‌یی ب پارێزین و كار بكه‌ین بۆ باشتركرنا وێ.
ئیرۆ ل به‌ر مه ده‌رفه‌ته‌ك هه‌یه كو ئه‌م گرێدانا خوه ب هه‌رێما كوردستانێ ڤه ب رێیا هه‌لبژارتنان نیشان بده‌ین، دڤێت ئه‌و كاندید بێنه هه‌لبژارتن یێن كو دبینین كو دێ باشترین شێوه نوێنه‌راتیا دۆزا كوردی و پاراستنا سنورێن هه‌رێمێ و مافێن وێ كه‌ن، د ڤێ چارچوڤێ دا، لیستا پارتیا دیموكراتا كوردستانێ، یا كو ژماره 190 هه‌لگرتیه، دیتنه‌كا زه‌لال هه‌یه كو ئارمانجا وێ ب هێزكرنا هێزا هه‌رێمێ و پاراستنا ده‌ستكه‌فتێن وێ یه، و ب شێوه‌یه‌كێ جددی كار دكه‌ت بۆ پێشخستنا ژێرخانا هه‌رێمێ و ب هێزكرنا سه‌قامگیریێ و به‌رگریكرن ژ مافێن كوردان د به‌رامبه‌ر ئاسته‌نگێن هه‌رێمی و نێڤده‌وله‌تی دا.
پارتیا دیموكراتا كوردستانێ، ب سه‌روكاتیا سه‌روك مه‌سعود بارزانی، هه‌رده‌م ل پێشیا وان هێزان بوویه یێن كو به‌رگریێ ژ هه‌رێمێ دكه‌ن و هه‌ول دده‌ن جهێ وێ یێ سیاسی و ئابوری ب هێز بكه‌ن، هه‌لبژارتنا نوێنه‌رێن ڤێ لیستێ واته پشته‌ڤانیكرنا دیتنه‌كێ یه كو گرنگیێ ددت پاراستن و ب هێزكرنا هه‌رێمێ و به‌رده‌وامبوون د ئاڤاكرنا پاشه‌رۆژه‌كا گه‌ش بۆ نفشێن داهاتی دا.