سه‌ما
كیلیان مباپی ستێرا ریال مەدریدێ یێ ئیسپانی، دخوازیت كو گازی وی نەكەن بۆ تیما نەتەوەیی یا فرەنسایێ ژ بلی د یاریێن گرنگ دا، ئەڤە پشتی كو وی ژ لیستا وەلاتێ خوە هاتە دەرئێخستن ب بەهانەیا باشتر ساخبوونێ پشتی برینداربوونا كو دگەل كلوبێ پایتەختێ توشی بوو.
مباپی راستی رەخنەیێن بەرفرەه ژ ئالیێ جەماوەرێ فرەنسی ڤە هات پشتی دەرئێخستنا وی ب تایبەتی كو وی د یاریا داوی یا تیما خوە دا بەری راوەستانا نێڤدەولەتی بەشداری كربوو، بەری كو رەخنە زێدەتر ببن پشتی كو ئەو ل كلوبەكا شەڤێ ل ستۆكهۆلما سویدێ هاتە دیتن د وی دەمی دا كو تیما وەلاتێ وی ل بوداپێستا مەجەرستانێ دلیست.
مالپەرا “فوت مێركاتو” یا فرەنسی گۆت كو مباپی د ماوەیا راوەستانا نێڤدەولەتی یا بوری دا د ئیلونێ دا، ب دیدیێ دیشامب راهێنەرێ تیما وەلاتێ خوە دابوو زانین كو ئەو ناخوازیت د ماوەیا راوەستانا نێڤدەولەتی یا نوكە دا بەشدار ببیت، و یاریكەرێن تیمێ ژی هایداری ڤێ یەكێ بوون.
راپۆرێ زێدەكر كو مباپی بدەستڤەئینانا خەڵاتا تۆپا زێرین ل ساڵا 2025ێ كریە ئارمانجا سەرەكی، و ژ بۆ ڤێ یەكێ تەنێ دخوازیت د یاریێن فرەنسایێ یێن “گرنگ” دا ركابەریێ بكەت، دا كو پێشیا برینداربوونەكێ بگریت كو دكاریت ڤێ خەونێ خراب بكەت.
راپۆرێ زێدەكر: دیشامب راهێنەرێ تیمێ، و فیلیپ دیالۆ سەرۆكێ یەكێتیا فرەنسایێ ل سەر بابەتا دەرئێخستنا مباپی گەنگەشە كرن، و هەردوویان ل سەر وێ یەكێ رێككەفتن كو ئەڤە بریارەك بوو پشتی راوێژكرن دگەل مباپی و بەرچاڤگرتنا “خوەشگوزەرانیا” وی هاتیە وەرگرتن، چونكی راهێنەرێ تیمێ د دەمەكی بەری نوكە دا ڤێ هەیڤێ گۆتبوو كو سەركێشێ وی “د باشترین رەوشا دەروونی دا نەبوو” د ڤێ ماوەیێ دا.
هندەك ژ ستێرێن فرەنسایێ یێن بەرێ داخواز كرن كو بازنا سەركێشیا تیمێ ژ هێرشبەرێ ریال مەدریدێ بێتە وەرگرتن، د دەمەكی دا كو كۆمەڵا سەرەكی یا هەڤالبەندێن تیمێ گۆت كو “نە ئاسایی یە” كو مباپی نە ئامادە بیت، ب تایبەتی ب رۆلێ وی وەك سەركێشێ تیمێ.