ب هەلكەفتا(11/25)رۆژا بەرهەنگاربوونا توند و تیژیێ دژی ئافرەتێ ل جیهانێ،سەرێ رێز و نەوازشە دچەمینین بۆ وان دەیك و خووشكێن ئێزدی ئەڤێن ئێخسیر كەتینە دەستێ داعش و كرین و فرۆتن ب وان هاتی كرن و كارێن هۆڤانە دەرهەقێ وان هاتین ئەنجام دان لڤی سەردەمێ پێشكەفتی، كو جیهان هەموو پێكڤە یە مژوول و هزرا هندێ دكن كا چاوا بەرهەنگاری نەمانا توندوتیژیێ بن بۆ ئازادی و ئاشتیخوازیا ئافرەتێ،لێ جیێ داخێیە ل وەلاتێ مە كرین و فرۆتن ب كچ و ژن و بووك و دەیكێن مە دئێتە كرن ،هەر چەندە ئافرەت ل رۆژهەلاتا ناڤین ب رەنگەكێ گشتی هاتیە چەوساندن وتەپەسەركرن و هەتا رادەكی كار دئێتە كرن بۆ نەمانا ڤێ توندوتیژیێ و ب مافێ خۆ شاد بت،لێ ژنا ئێزدی بێ ئۆمێد بوویە ل ڤان هەلكەفتا و گوتگۆتكا و نەتەوەیێن ئێكگرتی و جیهانا پێشكەفتی و رێكخراوێن جڤاكێ سڤیل و دەرەوێن بەرپرسا و پارتا و حكومەتا كو گرەنتیا ئازادیا ژنا ئێزدی هەبت،ژبەركو هەتا ڤێ رۆژێ كرین و فرۆتن ب كچ و دەیكێن مە د ئێنە كرن و ئەڤ جیهانا بەرهەنگاربوونا توندوتیژیێ بێ دەنگە هەموو دكەر و لالن ،دێ چاوا جارەكا دی باوەریا وان لڤێ جیهانێ ئێت ژبەر ئیسلاما توند ل رۆژهەلاتا ناڤین بژیت.
نەخاسمە سەرهلدانا چەند پارت و لایەنێن سیاسی تایبەت ل عێراقێ و كوردستانێ مینا پارتا دەعوە و كـۆمەلا ئیسلامی،بێشك ترسا ئێزدیا زێدەبوویە ژ ڤان پارتێن دەستهەلات مینا پارتا دەعوە ل عێراقێ و دروستكرنا حەشدا شەعبی كو چوو جوداهی دناڤبەرا وێ و داعش دا نینن تەنها مەزهەب ئێك سووننەیە و ئێك شیعەیە نهۆ حوكمی ل عێراقێ دكن و دەستهەلات ب تەمامی كەفتیە دەستێن وان و لدووڤ یاسایێن شەریعەتا شیعی و قم و تەهران تەشریعا یاسایێ ل پەرلەمانێ عێراقێ دكن تایبەت بەری چەند رۆژا پرۆژەك یێ ئامادەكری ل پەرلەمانێ عێراقێ بۆ شوودان و ماركرنا كچێن تەمەن (9) سالی وئەم یێ ل وێ باوەریێ دێ بەردەوام لسەر ڤێ رێبازا شیعی كاركەن و زێدەگاڤی دێ هەبن لسەر ئافرەتێ و لبن پەردا ئایینی دێ مافێ ئافرەتێ ئێتە پێشیلكرن و تەپەسەركرن،ژبەركو پارتێن ئایینی یێ حوكمی دكن.
هەر چەندە لڤان سالێن بۆری پشتی روخاندنا رژێما گۆربەگۆر درێیا رێكخراوێن جڤاكێ سڤیل و پارتێن علمانی ل عێراقێ و كوردستانێ پێنگاڤێن باش هاتینە هاڤێتن بۆ رێزگرتنا مافێ ئافرەتێ،لێ جیێ داخێیە پارتا ئیسلامی یا دەعوە ل عێراقێ جارەك دی كەفتیە بن باندۆرا ئیرانێ و بیروباوەرێن خۆ سەپاندینە لسەر مللەتێ عێراقێ بگشتی،ب دیتنا كچا ئێزدی ئەگەر ئافرەت ل عێراقێ و كوردستانێ ئازاد بت ژلایێ مافێ خۆ و بەرهەنگاری توند و تیژیێ نەبت،هەر ژنا ئێزدی ترسا فەرمان و هاتنا داعش لپێ ناڤەكێ دی هەیە و دێ هەبت،ئەڤجا پتریا ژنا ئێزدی دخوازت ل ئەورۆپا بژیت هەم ژ ئیسلاما توندرەو دێ رزگار بت و دور كەفت هەم دێ ب مافێ خۆ شاد بت و دێ ژ توند و تیژیا زەلامی ژی رزگاربت.
