سه‌ما
میر حازم ته‌حسین به‌گ، میرێ ئێزدیان ل كوردستان و عیراق و جیهانێ و سەرۆکێ جڤاتا روحانى يا بلند يا ئێزدیان، پێشوازی ل پاتریک دۆریل باڵیۆزێ فەرەنسا ل عیراقێ دگەلدا یان برایم کونسۆلێ گشتی یێ فەرەنسا ل هەولێرێ كر.
پشتی ب خێرهاتنا باڵیۆزێ فەرەنسی و شاندێ دگەلدا، میری گوت کو دەولەت و گەلێ فەرەنسا پشتگیریا جڤاکا ئێزدی و دوزا وان کریە ژ رۆژا ئێکێ یا جینۆسایدا ئێزدیان ل شنگالێ، دەمێ وان چاڤپێکەفتن دگەل جێگرێ وەزیرێ دەرڤە یێ فەرەنسی کری، وی ب ئاشکرایی گۆتیە کو ئەو دێ پشتەڤانیێ و هاریکاریا وان کەن ئەو روژەکا دیرۆکی بوو و ب راستی فەرەنسا د گەلەک پرسان دا دگەل مە راوەستیا.
میری دیار ژى کر، دەولەتا فەرەنسا گرنگە بو وان و دخوازن پەیوەندیێن باش بەردەوام بن، و نوکە ره‌ڤه‌نده‌كا ئێزدی یا بەرچاڤ ل فەرەنسا هەیە وان داخواز کر کو گرنگی ب وان و پرسێن وان یێن جودا بهێتە دان.
میری دوپاتكر، ئەو دڤێن نیشا وان بدەن کا چ ب دەستێ رێکخراوا داعشا تیرۆریست هاتیە کرن ژ تێگەهشتنێ دەربازە و مە هزاران ژ گەنج و زەلام و ژنان وندا کرن، زێدەباری رەڤاندنا هزاران ژن و زاروک کو هێشتا چارەنڤیسێ هندەکان ژ وان نەدیارە.
گۆتژى: ئەڤ جینۆساید، جینۆسایدا 74 یە دژی ئێزدیان و ئەم داخواز دکەین کو مافێن مە د یاسا و دەستوران دا ل سەر ئاستێ نیشتمانی بێنە دان و پشتگیری ژ مە بهێتە کرن ل سەر ئاستێ هەرێمی و نێڤدەولەتی، هەروەسا وەک ئەم دئێشین، کێمینەیێن دی یێن عیراقێ ژی دئێشن.
میری خوياكر ژى: کو نە ل سەر بنگەهێ وەلاتیبوونێ دگەل مە هاتیە رەفتارکرن، ب تایبەتی د دانانا یاسا و رێنمایێن کو ژ لایێ دەزگەهێن یاسادانان ڤە دەردکەڤن.
ميرێ ئێزديان باس ل وێ يه‌كێ ژى كر، دەولەتا فەرەنسا گەلەک پرۆژە ل شنگالێ پێشکێش کرینە، لێ ئەم هیڤیدارین پتر پرۆژێن پێشکەفتنێ بهێنە کرن دا کو ژێرخانا شنگالێ باشتر ببیت و دۆسیەیا ئاوارەبوونێ بهێتە گرتن و ئاوارە ب سەربلندی ڤەگەڕن مالێن خۆ.
دوپاتكر ژى، گرنگە فەرەنسا جینوسایدا ئێزدیان ناس بکەت و داخوازێ ژ وە دکەین کو هەول بدەن دگەل حکومەتا فەرەنسا دا یاسایەک دەربێخن کو جینۆسایدا ئێزدیان ناس بکەت، هەروەک ل ئەلمانیا بوویی و وان جینوسایدا ئێزدیان ناسی، هه‌روه‌سا هیڤیدارین خالەکا پەیوەندیێ د ناڤبەرا هەوە و ره‌ڤه‌ندا ئێزدی یا ل فەرەنسا دا هەبت دا کو زانیاریان ل سەر جینۆسایدێ بدەنە هەوە و هون ل سەر رەوشا وان ئاگەهدار بن و هاریکاریا وان بکەن.
میری گۆتژى: ل جەم مە زانیاری هەنە کو گەلەک فەرەنسی بووینە ئەندامێن رێکخراوا تیرۆریستی، لێ هەتا نۆکە مە نەدیت کو یەک ژ وان هاتبیتە دادگەهکرن وەک ل وەلاتێن دی بوویی.
ژ لایێ خۆ ڤە، باڵیۆزێ فەرەنسا سوپاسیا میرى کر ل سەر پێشوازیا گەرم، گۆتژى کو ئەم پشتراستیا پشتەڤانیا دەولەتا فەرەنسا بۆ جڤاکا ئێزدی دکەین و سەرەدانێن مە یێن بەردەوام باشترین بەلگەنە ل سەر پشتەڤانیا مە یا سیاسی بۆ هەوە.
ئاماژه ب وێ چه‌ندێ دا کو ئەو دێ سەرەدانا شنگالێ کەن دا کو پشتەڤانیا فەرەنسا بۆ هەوە پشت راست بکەن و گرنگیا گرتنا دۆسیەیا شنگالێ و هەروەسا دا کو ل سەر رەوشێ ل وێرێ ئاگەهدار بن و کا چاوا دکارن تشتان ل وێرێ چارەسەر بکەن ب هەڤکاری دگەل حکومەتێن بەغدا و هەولێرێ.
پاتریک دۆریل دياركر، ئاڤاکرنا نەخۆشخانا شنگالێ گەهشتیە قوناغێن خۆ یێن داوی و ئەم هەول ددەین دگەل هەمی لایەنان هەڤکاریێ بکەین دا کو پتر پشتەڤانیێ پێشکێش بکەین و ژ پێشینەیێن مە یە کو گفتوگۆیەکا چڕ دگەل بەغدا و هەولێرێ بکەین ژ بۆ ڤەگەڕیانا ئاوارەیان و پەیداکرنا ژینگەهەکا ئارام بۆ ڤەگەڕیانا وان و زێدەکرنا پشتەڤانیا دارایی بۆ ئاوارەیان دا کو هان بدەنە وان بۆ ڤەگەڕیانێ و پەیداکرنا ژێرخانەکا گونجای بۆ پێشکێشکرنا خزمەتگوزاریان.
راگه‌هاند ژى، ئەم ددانین کو یا هاتی ب سەرێ جڤاکا ئێزدی جینۆسایدە ب هەموو پیڤەران، لێ دڤێت ناسینەکا فەرمی ژ لایێ دەستهەلاتا یاسادانان و دادگەهێن فەرەنسا ڤە هەبت، لەوما ئەم کار دکەین دا کو بگەهینە زانیاریێن تێر و تەسەل ل سەر جینۆسایدێ دا کو پێشکێشی دەستهەلاتێن پەیوەندیدار بکەین دا کو بڕیارێ ل سەر بدەن.
ته‌كه‌زكر، ئەم چاڤەڕێی سەرەدانا سەرۆک مانویل ماکرۆن بۆ عیراقێ دکەین و دێ ژمارەک سیناتور دگەل وی بن و دکاریین پرسێ ل بەر وان ڤەکەین دا کو پشتەڤانیا بیرۆکێ بکەن و کار ل سەر بکەن.
د داویا هەڤدیتنێ دا، باڵیۆزێ فەرەنسی و شاندێ دگەل وی گەڕیانەک ل ناڤ پەرستگەها لالش کر دا کو ل سەر گرنگترین داب و نەریت و رێورەسمێن ئایینی یێن کو ل پەرستگەهێ د درێژاهیا سالێ دا دئێنە ئەنجامدان ئاگەهدار بن.
