سه‌ما
نەهـ سال ل سەر ئۆپەراسیۆنا شنگالێ را دەرباز دبن، ئەو سۆزا پشتی سێ رۆژان ژ داگیرکرنا شنگالێ سەرۆک بارزانی دابوو بابێ شێخێ ئێزدیان، ل بەر چاڤێن هەموو جیهانێ هاتە جێبه‌جێكرن.
ئۆپەراسیۆن ب سەرپه‌رشتيا راستەوخۆ یا سەرۆک بارزانی و بەشداریا پتر ژ 7 هزار و 500 پێشمەرگێن کوردستانێ و هێزێن ئاسمانی یێن هەڤپەیمانێن نێڤدەولەتی هاتە ئەنجامدان، د ماوێ کێمتر ژ 24 دەمژمێران دا شنگال هاتە ئازادکرن و سەرۆک بارزانی سۆزا خۆ بجيهـ ئانى.
نەهـ سال د سەر ڤێ داستانێ را دەرباز دبن، کو وەک هەر دەم ناڤێ پێشمەرگەى کرە مانشێتێن سەرەکی یێن میدیایێن جیهانی، ئازادکرنا شنگالێ بەرهەمێ وێ سۆزێ بوو یا سەرۆک بارزانی، پشتی داگیرکرنا وێ ل 3ێ تەباخێ 2014ێ ژ لایێ چەکدارێن رێکخراوا داعشێ ڤە، ژ بۆ ڤێ ئارمانجێ ب هزاران پێشمەرگێن کوردستانێ د ئۆپەراسیۆنێ دا بەشدار بوون.
ئۆپەراسیۆن ل سپێدەهیا 13ێ تشرينا دووێ یا سالا 2015ێ ب سەرپه‌رشتيا سەرۆک بارزانی و پشتەڤانیا هێزێن ئاسمانی یێن هەڤپەیمانان دژی داعشێ دەست پێ کر، پتر ژ 7 هزار و 500 پێشمەرگێن کوردستانێ د ئۆپەراسیۆنێ دا بەشدار بوون، ل ده‌ستپێكێ ئۆپەراسیۆن ب دۆرپێچکرنا چیایێ شنگالێ ژ سێ ئالیان ڤە دەست پێ کر، دوو ئارمانج ژی د پشت ڤێ گاڤێ دا هەبوون: یا ئێکێ کۆنترۆلکرنا شنگالێ بوو کو د دەمێ داگیرکرنێ دا پتر ژ 5 هزار کەسێن بێ گونەهـ هاتنە کوشتن، یا دووێ ژی، بڕینا رێکا سەرەکی یا ناڤبەرا باژێرێ موسل ل عیراقێ و رەققە ل سوریایێ، کو هەردوو ژی د بن کۆنترۆلا داعشێ دا بوون و وی دەمی شنگال خالا گرێدانا ڤان هەردوو باژێران بوو.
هێزێن پێشمەرگەى د ڤێ گاڤێ دا سەرکەفتی بوون و شیان رێکا ناڤبەرا باژێرێ رەققە و موسل ببڕن، د شەڕ و پێکدادانان دا پتر ژ 100 چەکدارێن داعشێ هاتنە کوشتن، هەتا داویا وی رۆژێ، 150 کیلۆمەترێن چوارگۆشە ل شنگالێ و دەڤەرێن دۆر ب تەمامی ژ بن دەستهەلاتا چەکدارێن داعشێ هاتنە پاقژکرن، ئۆپەراسیۆن کو پێشبینی دکر دێ چەند هەفتیان ڤه‌کێشت، لێ د کێمتر ژ 24 دەمژمێران دا سەرکەفتن هاتە راگەهاندن.
سەرۆک بارزانی د پەیاما سەرکەفتنێ دا جیهان ژ جێبه‌جێه‌کرنا سۆزا خۆ پشتراست کر، سەرکەفتنا پێشمەرگەه هەموو میدیایێن جیهانی و عەرەبی داگیر کر، گەلەک ژ ناڤەندێن نێڤدەولەتی پێشمەرگەى وەک تاکە هێزا شکێنەرا ئەردی بۆ داویئینانا ئەفسانەیا داعشێ وەسف کرن.