ناڤەندا نووچەیان – سەما
جڤاتا پارێزگه‌ها نه‌ينه‌وا بزاڤێ دكه‌ت قايمقامه‌كێ نوو بۆ قه‌زا شنگالێ ب دانێت، فراكسيۆنا پارتى ل جڤاتا پارێزگه‌هێ ژى دبێژت: “ئه‌ڤ پرسه دڤێت ب رێككه‌فتنا هه‌موو ئاليان بێته ئێكلاكرن”.
ل رۆژا دووشه‌مبوويێ 9ى كانوونا ئێكێ 2024ێ،جه‌مال شه‌شۆ، ئه‌ندامێ جڤاتا پارێزگه‌ها نه‌ینه‌وا ل سه‌ر فراكسيۆنا پارتى بۆ سه‌ما دياركر، بزاڤ دئێنه كرن ب ریێا جڤاتا پارێزگه‌هێ قايمقامه‌ك بۆ قه‌زا شنگال بێته دانان، وه‌كو فراكسيۆنا پارتی هیڤیدارین ئه‌ڤ پرسه ب هه‌ماهه‌نگی و رێككه‌فتنا هه‌موو ئاليان بت، داكو ببته جهێ باوه‌ری و رازیبوونا خه‌لكێ و خزمه‌تا ده‌ڤه‌رێ بكه‌ت.
شه‌شۆ دا زانين ژى، دانانا پۆستێن كارگێرى ل قه‌زا و ناحييێن سنوورێ پارێزگه‌هێ ب رێككه‌فتن نه‌بوويه و فراكسيۆنێن دى ب تاكه لايه‌نى برياردايه.
حكومه‌تا هه‌رێما كوردستانێ و حكومه‌تا عيراقێ رێككه‌فتن ل دۆر ئاسايكرنا ره‌وشا شنگالێ ئيمزاكريه، ئێك ژ به‌ندان ئه‌وه ئيدارا شه‌رعى ڤه‌گه‌رته شنگالێ ڤه و هێشتا ئه‌و رێككه‌فتن ژلايێ به‌غدايێ ڤه نه‌هاتيه بجهئينان.