ناڤەندا نووچەیان – سەما
مه‌يان خێرى به‌گ، خاتوونا ئێكێ يا ئێزديان داخوازا پاراستنا ئێزديان ل رۆژئاڤايێ كوردستانێ دكه‌ت و دبێژت:” ناخوازين جينۆسايده‌كا دى ل دژى ئه‌وان بێته كرن”.
ل گۆڕه‌ى زانياريان دۆرێن پێنج هه‌زار ئێزديان ل تاخێن ئه‌شره‌فيێ و شێخ مه‌قسوود ل باژێرێ حه‌له‌بێ ئاكنجى بوون و نۆكه گه‌له‌ك ژ وان ژبۆ پاراستنا گيانێ خۆ ئاواره‌بووينه ڤه.
مه‌يان خێرى به‌گ، خاتوونا ئێكێ يا ئێزديان، د داخويانيه‌كێ دا بۆ سه‌ما گۆت:” ژ حكومه‌تێن هه‌رێما كوردستانێ، عيراقێ و جڤاكا نێڤ ده‌وله‌تى دخوازين رێکێ بگرن جینۆسایدەکا دی یا وەک عەفرین و شنگالێ ل حەلەبێ دوبارە نەبت و ب تايبه‌ت كچ و ژنان بپارێزن”.
دبێژت: “ژنێزيك ڤه چاڤدێريا ره‌وشا ئێزديان ب تايبه‌ت ل باژێرێ حه‌له‌بێ ل سووريێ دكه‌ين و لايه‌نێن په‌يوه‌نديدار ل سه‌ر ره‌وشا ئه‌وان هاتينه ئاگه‌هداكرن”.
ژ ده‌ما هێرشا گرۆپێن چه‌كدار يێن سه‌ر ب توركيا ڤه بۆ سه‌ر باژێرێ حه‌له‌بێ، ب سه‌دان خێزانێن ئێزدى كۆچبه‌ر و ئاواره‌بوون، هنده‌ك ژ وان ل جهێن خۆ ماينه و هنده‌ك ژى ڤه‌گه‌رياينه رۆژهه‌لاتێ فوراتێ و عه‌فرينێ.