ناڤەندا نووچەیان – سەما
حکومەتا عيراقێ کەیسا ئێزدیان وه‌كو جینۆساید نابینت و هه‌ڤكار نينه دادگەهەکا تایبەت بۆ ڤى کەیسى ڤەکەت.
10 ساڵ ل سه‌ر جينۆسايدا ئێزديان ل سه‌رده‌ستێ داعشێ ده‌ربازدبن و هێشتا چاره‌نڤيسێ زێده‌ترى 2 هه‌زار ره‌ڤانديان يێ ديارنينه و ب ده‌هان گۆڕێن بكۆم نه‌هاتينه ڤه‌كرن.
ل رۆژا پێنج شه‌مبوويێ 12ى كانوونا ئێكێ 2024، حه‌سۆ هورمى، سەرۆکێ سازییا ئێزدیان یا نێڤدەولەتی بۆ بەرەنگاربوونا جینۆسایدێ بۆ سه‌ما راگه‌هاند: حکومەتا عيراقێ نەڤێت دادگەهەکا تایبەت بۆ کەیسا جینۆسایدا ئێزديان ڤەکەت ،ژبەرکو دێ گەلەك بەلگەنامە ئاشکرابن و گەلەك کەس دێ ئێنە دادگەهکرن، لەورا بەغدا ل سەر ڤێ کەیسى یا رژد نینە و دبنيات دا نابينت وه‌كو جينۆسايد.
سەرۆکێ سازییا ئێزدیان دبێژت:”حکومەتا هەرێما کوردستانێ گەلەک یا هەڤکارە بۆ جینۆسایدا ئێزدیان، بۆ ئێکەم جار شاندەکێ دادوەران ژ پاریس قەستا هەرێمێ کرن بۆ دیتنا دیدەڤان و بەلگەنامەیێن جینۆسایدا ئێزدیان ل شنگالێ، لێ مخابن حکومەتا عێراقێ وەکو پێدڤی يا هەڤکار نینە”.
ئاشكراكر:” حكومه‌تا عيراقێ ل دووڤ مادا چار ژ یاسايا تيرۆرێ سەردەره‌یێ دگەل تاوانبارێن جینۆسایدێ دکەن و ئەڤە يا باش نینە عيراق دکەت”.
ل رۆژا 3-8-2014ێ، رێكخراوا داعش يا تیرۆرستى بێ جوداهییا ته‌مه‌نى و ره‌گه‌زى و بێ به‌رچاڤ وه‌رگرتنا پیڤه‌رێن مرۆڤایه‌تیێ ب شێوه‌یه‌كى هۆڤانه ده‌ست بسه‌ر شنگالێ داگرتن و ب هه‌زاران گه‌نج و لاو و پير جينۆسايدكرن و ب هه‌زاران ژن و كچێن ئێزدى ره‌ڤاندن ، ده‌ڤه‌ر و جهێن ئۆلى وێرانكرن.