ناڤەندا نووچەیان – سەما
ل سه‌ر ئاستێ جيهانێ 13 وه‌لاتان كۆمكوژيا ل دژى ئێزديان وه‌كو جينۆسايد ناسانديه و هێشتا حكومه‌تا عيراقێ دانپێدان نه‌كريه.
پێنج شه‌مبوويێ 19ى كانوونا ئێكێ 2024ێ، جه‌هوه‌ر عه‌لى به‌گ، وه‌كيلێ ميرێ ئێزديان بۆ كاروبارێن په‌يوه‌نديان بۆ سه‌ما گۆت:” جڤاكێ نێڤ ده‌وله‌تى گه‌له‌گ گرنگيێ ب جينۆسايدا ئێزديان دده‌ت، ئه‌و ژى به‌رى دو رۆژان په‌رله‌مانێ سويسرا كۆمكوژيا ئێزديان ل سه‌ر ده‌ستێ رێكخراوا داعش يا تيرۆرى خسته ده‌نگدانێ و وه‌ك جينۆسايد ناساند”.
وه‌كيلێ ميرێ ئێزديان ئاماژه ب وێ چه‌ندێ دا، هه‌تا نوكه 13وه‌لاتان و دناڤدا هه‌رێما كوردستانێ كه‌يسا ئێزديان ب جينۆسايد ناسانديه، لێ جهێ داخيێيه هێشتا حكومه‌تا عيراقێ دانپێدان ب جينۆسايدێ نه‌كريه، ژبه‌ر هندێ ئه‌ڤ كه‌يسه ژلايێ دادگه‌ها لاهاى ڤه نه‌هاتيه لڤاندن.
تيرۆرستێن داعش ل 3ى ته‌باخا سالا 2014ێ كۆمه‌لكۆژيه‌ك ل دژى ئێزديان ل شنگالێ ئه‌نجامدابوو و تێدا ب سه‌دان وه‌لاتيێن ئێزدى هاتنه كوشتن و ب هه‌زاران ئێزديێن دى هاتبوونه ره‌ڤاندن يان بێسه‌روشوين ببوون.