ناڤەندا نووچەیان – سەما
رێکخەرێ ڕاسپاردەيێن نێڤ ده‌وله‌تى ل حکومەتا هەرێما کوردستانێ راگەهاند؛ پێشوازیێ ل دانپێدانا مێژوویی يا پەرلەمانێ سویسرا دکەین بۆ ناساندنا جینۆسایدا ئێزدیان ژلایێ داعشێ ڤە.
دیندار زێباری، رێکخەرێ ڕاسپاردەيێن نێڤ ده‌وله‌تى ل حکومەتا هەرێما کوردستانێ ده‌رباره‌ى بڕیارا پەرلەمانێ سویسرا بۆ ب جینۆساید ناساندنا کۆمكوژيا ئێزدیان، پەیامه‌ك به‌لاڤكر و تێدا دبێژت: پێشوازيێ ل دانپێدانانا مێژوویی يا پەرلەمانێ سویسرا بۆ جینۆسایدا ئێزدیان دکەین کو ژلایێ داعشێ ڤه هاتيه ئەنجامدان و ئەڤ بڕیارە پێنگاڤه‌كا دى يا گرنگه بۆ گەهشتن بۆ دادپەروەريێ ولێپرسينێ ل به‌رامبه‌ر تاوانێن هاتينه كرن و قەرەبووكرنا قووربانیێن تیرۆرێ و زیانڤێکەفتيان.
حکومەتا هەرێما کوردستانێ دڤان سالێن داويێ دا ل سەر ئاستێ ناڤخۆ و نشتيمانی و نێڤ دەوڵەتی هه‌موو بزاڤ كرينه ئەو تاوانێن تیرۆرستێن داعش وەک تاوانێن جینۆسایدێ بەرامبەر ئێزديان ئەنجامداين بناسينت.
ل رۆژا سێ شەمبوويێ 17ى کانوونا ئێكێ 2024، پەرلەمانێ سویسرا ب پتريا دەنگێن ئەندامێن پەرلەمانى، ئەو تاوانێن داعش ل دژی ئێزدیان ئەنجامداين، ب جینۆساید ناساند، ب ڤێ چه‌ندێ 17 وه‌ڵاتان ب ڕێيا پەرلەمانێن خۆ دانپێدان ب جینۆسایدا ئێزدیان كريه.