ناڤه‌ندا نووچه‌یان – سه‌ما
گاڤەکا دى یا نێڤدەولەتى بۆ ب جینۆسایدناسینا تاوانێن دژى کوردێن ئێزدى، پشتى چەند وەڵاتان، پەرلەمانێ سویسرا ب پرانیا دەنگان کۆمکوژیا ئێزديان ب تاوانا جینۆسایدێ ناساند، ب دەنگێ 105 پەرلەمانتاران بەرامبەر 61 دەنگێن نەخێر دان ب کۆمکوژیا ئێزدیان، هەرچەندە 27 پەرلەمانتار بەشدارى روونشتنێ نەبوون.
د ڤێ دەرباره‌ى دا، شێخ زێدۆ باعەدرى، راوێژکارێ پەرلەمانێ کوردستانێ بۆ کاروبارێن ئێزديان بۆ سه‌ما راگەهاند: د گاڤەکا دیرۆکى دا، شان ب شان دگەل وەڵاتێن دى یێن جیهانێ، پەرلەمانێ سویسرا دەنگ دا سەر جینۆسایدکرنا ئێزدیان ل سەر دەستێ داعش، ئەو ژى ل سەر بنگەهێ کۆمکرنا وان بەلگەنامێن کو هاتینە دانان بەر دەستێ وان و ب خۆ دیتین کا چ کارەسات قەومیایە ل دەڤەرێن کوردێن ئێزدى، ئەڤ پشته‌ڤانى و بڕیارا پەرلەمانى، يا وێرانه‌يه و دەستکەفته‌كێ مەزنە بۆ ئێزدیان کو د وێ ڕێکێ را دێ گەهنە مافێن خۆ یێن ڕەوا، د قەرەبووکرنێ دا و ڤەگەڕیانا ئاوارەیان بۆ جهێن خۆ و ئاڤاکرنا دەڤەرێن وان و پێشڤەبرنا شوونوارێن ئۆلى و پەرەپێدانا کەلتوور و چاندا وان.
شێخ زێدۆ باعەدرى دبێژت: “هەتا نها 13 پەرلەمانێن وەڵاتێن جیهانێ و چەند رێکخراوێن مافێن مرۆڤان، کۆمکوژیا ئێزدیان ب جینۆساید ناساندینە، هەروەسا پەرلەمانێ سویسرا ئيدانه‌‌يا ڤێ تاوانێ یا دژى مرۆڤایەتیێ کر و ئاماژە ب وێ چەندێ ژى کر کو ب شێوەیەکێ رێکخستى ئێزدى هاتینە ئاوارەکرن و جهێن کەلتوورى یێن وان ژى هاتینە وێرانکرن”.
باعەدرى ئەو چەندە ژى راگەهاند: دانپێدانان ب کۆمکوژیا ئێزديان د بەرامبەر وان تاوانان دا بوو یێن رێکخراوا تیرۆرستى یا داعش ل 3ێ تەباخا 2014ێ ئەنجامداین و تێدا هه‌زاران ئێزدى ئاوارە بوون و ژمارەکا زۆر ژى گیانێ خۆ ژ دەست دا یان هاتنە گرتن و بێ سەروشوون کرن.
راوێژكارێ ئێزدى باس ل وێ چه‌ندێ ژى كر” مخابن حکومەتا عیراقێ د ئاستێ قوربانیان و وێرانکرنا دەڤەران و قەرەبووکرنا کەسوکارێن قوربانیان دا نەبوویە و چ هەلویست نەبوویە و چاڤێن خۆ گرتینە ل ئاستێ دڕندەتیا داعش یا دژى کوردێن ئێزدى کرى”.
ناڤبرى پێ باشه” وەڵاتێن دى ژى ب هەمان شێوە بڕیارێ بدەن و هەلویستێن خۆ یەک بکەن بۆ ب جینۆسایدناساندنا کوردێن ئێزدى و سوپاسیا هەموو لایەكى دکەین و دێ د بزاڤان دا بەردەوام بین و ناسه‌كنين دا کو هەموو ئەڤ تشتە ببنە گاڤەکا گرنگ بۆ هندێ کو د دادگەهەکا نێڤدەولەتى دا ئەو داعشێن تاوان ل عیراق و سووریێ ئەنجامداین بێنە دادگەهکرن”.