ناڤەندا نووچەیان – سەما
ده‌ستهه‌لاتێن ئەلمانیا دوو هەڤژینێن عیراقی توهمەتبار کرن ب ئه‌گه‌رێ ره‌ڤاندن و خراب بکارئینانا کچێن ئێزدی وەک کۆیلە.
ل گۆڕه‌ى راپۆرتەکا “ئەسۆشیەیتد پرێس”، داواکارێ گشتی یێ فیدرالی یێ ئەلمانی ل ڕۆژا دووشه‌مبوويێ 30ى كانوونا ئێكێ 2024ێ، دو هەڤژینێن عیراقی توهمەتبار کرن ب کۆیلەکرن، ئەشکەنجەدان و تاوانێن شەڕی”، و گۆت:”دوو کچێن ئێزدی یێن بچووک وەک کۆیلە گرتینه و دەستدرێژیا لەشی و سێکسی ل سەر وان کریە”.
ل دووڤ راپۆرتێ، “ئەو ژن و مێر، کو تنێ ب ناڤێن Twana H.S. و Asia R.A. هاتینە نیاسین ل گۆڕ یاسایێن تایبەتمەندیا ئەلمانی، ل نیسانێ ل باڤاریا هاتنە گرتن”.
داواکارێ گشتی د داخويانيه‌كێ دا گۆت:”هەردو هەڤژین ئەندامێن (رێکخراوا داعش) بوون د ناڤبەرا تشرینا ئێکێ 2015 و کانونا ئێکێ 2017 دا”، وان کچەکا ئێزدی یا 5 سالی وەک کۆیلە ره‌ڤانديه ژ داویا 2015ڤە، و کچەکا 12 سالی ژی ژ تشرینا ئێکێ 2017ڤە”.
راپۆرتێ دیار ژى کريه، داواکاران گۆتیه کو زەلامی گەلەک جاران دەستدرێژیا سێکسی ل سەر هەردوو کچان کریە و ژنێ ژی ژۆر ئامادە دکر و بۆیاخ ل روویێ ئێک ژ کچان ددا و هەردو هەڤژینان توندوتیژیەکا لەشی یا زۆر بکارئیناینە و نەهێلاینە ئەو ئۆلا خۆ پەیرەو بکەن، هەروەسا نەچار کرینە کارێن مالێ بکەن و زارۆکان خوه‌يی بکەن.
هه‌روه‌سا ل گۆڕه‌ى راپۆرتێ، دئێته گۆتن کو زەلامی جارەکێ کچا مەزن ب دارا گەزیکێ لێدایە، و ژن ژی توهمەتبار دبت ب سۆتنا دەستێ کچا بچوک ب ئاڤا گەرم، و هەردوو زارۆک گەلەک جاران نەچار دکرن کو نیڤ ده‌مژمێرێ ل سەر لنگەکى راوەستن وەک سزا.
هه‌ر دبه‌يانناما داواکارێ گشتی دا هاتیە کو “بەری کو ئەو ژ سووریێ دەرکەڤن د تشرینا دوویێ 2017 دا، گومانلێکریان هەردوو کچ رادەستی ئەندامێن دی یێن داعش کرن، ئاماژه ب وێ چه‌ندێ دا، ئەڤ هەموو تشت د خزمەتا ئارمانجا رێکخراوێ دا بوون بۆ ژناڤبرنا ئۆلا ئێزدیان.