سێ شەمبوويێ، 31-12-2024، سەرۆک بارزانی ب هەلکەفتا سەرێ ساڵا نوو یا زاینی، (2025) به‌لاڤكر و ئاماژە ب وێ چه‌ندێ كر ” ب هەلکەفتا سەرێ ساڵا نوو یا زاینی ، گەرمترین پیرۆزباهی ل وەلاتییێن خۆشتڤی یێن کوردستانێ دکەم. پیرۆزباهیێ ل مالباتێن سەربلند یێن شەهیدان و پێشمەرگەیێن قەهرەمان دکەم و هیڤییا خێر و خۆشیێ بۆ هەمی لایان دخوازم.”
ده‌قێ په‌ياما سه‌رۆك بارزانى ب هه‌لكه‌فتا سەرێ ساڵا نوو یا زاینی:
ب هەلکەڤتا سەرێ ساڵا نوو یا زاینی، گەرمترین پیرۆزباهی ل وەلاتییێن خۆشتڤی یێن کوردستانێ دکەم. پیرۆزباهیێ ل مالباتێن سەربلند یێن شەهیدان و پێشمەرگەیێن قەهرەمان دکەم و هیڤییا خێر و خۆشیێ بۆ هەمی لایان دخوازم.
جهێ خۆشحالیەکا زۆرە کو هەلبژارتنێن پەرلەمانێ کوردستانێ د هەیڤا ئۆکتۆبەرا بوریدا ب سەرکەڤتی هاتنە ئەنجامدان و د ڤان هەلبژارتنان دا گەلێ کوردستانێ پەیام و خواستا خۆ ب زەلالی گەهاند. هەر لسەر ڤی بنگەهی ژی دڤێت بەرسڤا دەنگ و داخوازێن خەلکێ کوردستانێ بهێتە دان، ئەو ژی ب رێیا پێکئینانا هەر چ زووتر یا کابینا دەهێ یا حکومەتا هەرێما کوردستانێ، دا کو حکومەتا هەرێمێ پلان و بەرنامەیێن خۆ بۆ خزمەتکرنا خەلکێ کوردستانێ بجهـ بینیت.
دووپات ژی دکەین کو پێدڤیە د چارچووڤێ دەستوور و رێککەڤتنان دا و ب رێیا دیالۆگ و هەماهەنگییا دناڤبەرا حکومەتا عیراقا فیدرال و حکومەتا هەرێما کوردستانێ دا، ئاریشەیێن دناڤبەرا هەردوو لایان دا بهێنە چارەسەرکرن و چ جاران ئاستەنگ بۆ مافێن خەلکێ کوردستانێ نەهێنە دروستکرن.
د دەمەکی دا ئەم بەرەڤ دەستپێکا ساڵا نوو دچین کو دەڤەرا مە د رەوشەکا هەستیاردا دەرباز دبیت. روودان و گوهۆرینێن سوریێ دگەل هندێ کو کاریگەری لسەر رەوشا دەڤەرا مە و هاوکێشەیان دادنیت، د هەمان دەم دا دەرفەتەکا نوویە بۆ گەلێن سوریێ کو ب رێیا دیالۆگ و لێکتێگەهشتنێ دا بنگەهەکێ قایم بۆ پێکڤەژیان و ئاشتی و سەقامگیریێ ئاڤا بکەن. دەڤەرا مە چ جاران بەرگەیا ئاریشە و توندوتیژی و تیرۆر و توندرەوی و نەسەقامگیریێ ناگریت، لەوما پێدڤیە هەمی لایەک پشت ب زمانێ دیالۆگ و لێکتێگەهشتنێ ببەستن و ژ ئینکارکرن و دەمارگیریا نەتەوەیی و ئایینی دوور بکەڤن. دڤێت هەمی لا بزانن کو خۆسەپاندنێ ئەنجام نابیت.
هیڤیدارین د ساڵا نوی دا ئاشتی و پێکڤەژیان لسەر دەڤەرا مە دا بهێت. ژ خودایێ مەزن داخواز دکەم گەلێ مە ژ هەمی جۆرێن نەخۆشی و نەهامەتی و کارەساتان دوور بیت.
مەسعود بارزانی
31ێ کانوونا ئێکێ 2024