سه‌ما
چالاكڤانه‌كێ ئێزدى ل رۆژئاڤايێ كوردستانێ راگه‌هاند، شه‌ڕ ل باژێرێ حه‌له‌بێ ل سووريێ به‌رده‌وامه و نها ب هه‌زاران كۆچبه‌رێن ئێزدى ئاسێ ماينه و په‌يوه‌ندى دگه‌لدا هاتيه برين.
شه‌ش رۆژن چه‌كدارێن نێزیك توركیا به‌ره‌یا نوسره و ته‌حریرئه‌لشام هێرشه‌كا دژوار ل حه‌له‌بێ ده‌ستپێكرییه.
دووشه‌مبوويێ 2ى كانوونا ئێكێ 2024ێ،جابر جندۆ، چالاكڤانێ ئێزدى ل رۆژئاڤايێ كوردستانێ تايبه‌ت بۆ سه‌ما راگه‌هاند: نێزيكى شه‌ش هه‌زار كۆچبه‌رێن ئێزدى ل ده‌ڤه‌رێن شەهبایێ ، ته‌ل ره‌فعه‌ت، شێخ مه‌قسود و ئه‌شره‌فيێ ل حه‌له‌بێ ئاسێ ماينه و گرۆپێن چەکدار یێن سەر ب تورکیا ڤه بزاڤێ دكه‌ن وان ده‌ڤه‌ران كۆنترۆل بكه‌ن.
چالاكڤانێ ئێزدى ديار ژى كر، هنده‌ك كۆچبه‌رێن ئێزدى دمالێن خۆ دا ماينه نكارن ده‌ربكه‌ڤن و په‌يوه‌ندى دگه‌لدا هاتيه بڕين، هنده‌ك ژى به‌ره‌ف جزيرێ ڤه دچن ل رۆژهه‌لاتێ فوراتێ كو دبن ده‌ستێ هێزێن هه‌سه‌دێ دايه.
جابر جندۆ راگه‌هاند ژى، داخوازێ دكه‌ين ب زووترين ده‌م ڕێ ل به‌رده‌م كۆچبه‌رێن ئێزدى بێنه ڤه‌كرن، داكو خۆ بگه‌هيننه جزيرێ، ژبه‌ركو ژيانا وان دمه‌ترسيێ دايه.
ئاماژه ب وێ چه‌ندێ دا، ئێزدیێن ل حەلەبێ بەری 60 سالان ل وان دەڤەران ئاکنجیبووینە و یێن شەهبایێ ژی ل دەما هێرشا ل سەر عەفرینێ ئاوارە بووینە و د کەمپان دا دژین و د رەوشەکا خراب دانە.
چه‌ندين سازيێن ئێزديان هۆشدارى ژ مەترسییا جینۆسایدکرنەکا دی ل دژی ئێزدیان ل حەلەبێ دايه و خواستيه هه‌ر زوو دەستێوەردان بێنەکرن و ئەو بێنە پاراستن.